Dagur leikskólans

Í dag, mánudaginn 06. febrúar, er dagur leikskólans haldinn hátíðlegur í leikskólum landsins. 06 febrúar er merkisdagur í íslenskri leikskólasögu því þann dag árið 1950 stofnuðu frumkvöðlar leikskólakennara fyrstu samtök sín. Ávallt er eitt og annað gert í tilfeni dagsins í leikskólum víðs vegar um land, leikskólinn Brekkubær er þar engin undantekning. Á sl. ári voru t. a. m. hengdar upp myndir af börnunum og listaverk eftir þau komið fyrir í Landsbankanum, Sundabúð og Kauptúni. Rölt var um bæinn og komið við á völdum fyrirtækjum þar sem sungið var fyrir hlutaðeigandi starfsmenn – og dagurinn kláraður með pítsuveislu á Hótel Tanga. Má gera ráð fyrir að unghjörtun rölti um bæinn í fylgd kennara sinna í dag og gleðji fólk með söng sínum og nærveru.

Lífshlaupið – virk þátttaka Vopnafjarðarskóla

Lífshlaupið, heilsu- og hvatningarverkefni Íþrótta-og Ólympíusambands Íslands, var ræst í fimmta sinn  miðvikudaginn 01. febrúar sl. Á síðastliðnum árum hefur átt sér stað mikil vakning meðal fólks um gildi hreyfingar en þó virðist alltaf þörf á að minna á þessa staðreynd öðru hverju – öllu heldur með jöfnu millibili. Lífshlaupið á sér sum sé nokkurra ára sögu með almennri þátttöku íbúa víðs vegar um landið, í ár er Vopnafjarðarskóli sannarlega virkur þátttakandi því 20 af 24 starfsmönnum stofnunarinnar eru meðal þátttakenda í Lífshlaupinu í ár – og fá hvatningaróskir sendar á þessum vettvangi.

Guðríður – Guja – útskrifast sem PhD frá Hull háskóla

Vopnfirðingurinn, Guðríður - Guja – Ármannsdóttir, útskrifaðist sem doktor í markaðsfræðum frá Hull háskóla 25. janúar sl. Er Guju hér með færðar heillaóskir með áfangann en ung hélt hún út í heim og hefur sl. ár bæði kennt og numið í Englandi. Eru fréttir af Íslendingum sem láta að sér kveða á erlendri grund ávallt einkar ánægjulegar og þegar hlutaðeigandi er Vopnfirðingur að auki er það skylda að greina frá hlutaðeigandi á þessum vettvangi.

Fjölskyldumessa í Hofskirkju, rútuferð og kjötsúpa

Sunnudaginn 5. febrúar, kl. 11:00 verður fjölskyldumessa fyrir alla í Hofskirkju. Eftir guðsþjónustuna býður Kvenfélagið Lindin kirkjugestum upp á kjötsúpu í Staðarholti. Rútuferð verður frá Vopnafjarðarkirkju.

Fermingarbörn verða með bænir, 10-12 ára börn sýna helgileik og lesa ritningarlestur, kirkjukórinn syngur o.fl.

Rútuferð verður frá Vopnafjarðarkirkju kl. 10:40 og til baka frá Staðarholti um kl. 12:40.

Vopnafjörður 3ja aflahæsta höfnin

Líkt og greint var frá í gær er þess vænst að yfirstandandi loðnuvertíð geti fært þjóðarbúinu allt að 30 milljarða króna í tekjur og þar er hlutur Vopnafjarðar verulegur. Á heimasíðu Fiskifrétta, www.fiskifrettir.is, er ýmsan fróðleik að finna. Frá því er greint að Fiskistofa hafi tekið saman upplýsingar um landað magn af uppsjávarfiski eftir höfnum og landsvæðum frá 2007 til 2011 – og meðal hinna 3ja stærstu er Vopnafjörð að finna.

Aflahlutur HB Granda gæti orðið 100 þúsund tonn

Líkt og frá var greint síðastliðinn föstudag hefur Hafrannsóknastofnun lagt til að heildarafli á loðnu á yfirstandandi vertíð verði 760 þúsund tonn og byggir á niðurstöður mælinga á stærð loðnustofnsins í janúar. Fari ráðherra að tillögu stofnunarinnar, sem gera má ráð fyrir, er ljóst að heildarloðnukvóti íslenskra skipa á vertíðinni verður um 590 þúsund tonn og áætlað aflaverðmæti gæti orðið allt að 30 milljarðar króna. Hinn hluti kvótans fellur í hlut Norðmanna.

Markaðsstofan fundar og Ásta kvödd

Eins og greint hefur verið frá – og verður nánar vikið að síðar á þessum vettvangi – standa fyrir dyrum breytingar á stoðstofnanakerfi Austurlands, sem m. a. þýðir að núverandi stjórn Markaðsstofu Austurlands mun brátt heyra sögunni til. Um leið og stjórnin kveður hættir framkvæmdastjóri MA sl. 3ja ára, Ásta Þorleifsdóttir, og var kvödd með viðeigandi hætti að fundi stjórnar loknum í gær, mánudaginn 30. janúar. Heimildarmaður, sem einn stjórnarmanna, sat fundinn og hófið og tók þannig virkan þátt í kveðjustundinni á Hótel Héraði.

Veðrabrigði – enn á ný

Öðru hverju hafa hér á síðunni birst fregnir af veðrabrigðum íslensks vetrar – vors, sumars eða hausts ef því er að skipta. Hver minnist ekki síðastliðins vors þegar ríkti vetur fram í júní og í kjölfarið fylgdi sumar er samanstóð af fáeinum dögum – svo virðist sem af nógu sé að taka. Þann 16. janúar sl. hvarf því sem næst allur snjór um skamman tíma, þann 21. tók að snjóa poppkornum og ekki snjó eins myndarleg snjókornin voru sem til jarðar féllu. Allt frá í nóvember hefur gengið á slíkum veðraköflum þar sem snjór fellur, í kjölfarið hlýindi sem brætt hafa snjóinn að hluta en bara hluta og myndað svell staðið hafa um hríð með tilheyrandi hættu fyrir fótgangandi jafnt sem akandi.

Mælingar á veiðistofni loðnu lokið og útlit fyrir góða vertíð

Hafrannsóknarstofnun leggur til að leyfilegur hámarksafli á loðnuvertíðinni 2011/2012 verði 765 þúsund tonn. Þetta er gert í ljósi nýrra mælinga auk gildandi aflareglu um að skilja 400 þúsund tonn eftir til hrygningar. Ekki þarf að hafa yfir það mörg orð hver ávinningur samfélagsins er með auknum kvóta, Íslands í heild og útgerðarstaðar eins og Vopnafjörð, þar sem allt snýst um gjafmildi hafsins.

Rannsóknarskipið Árni Friðriksson var við rannsóknir og mælingar á stærð loðnustofnsins frá sunnanverðum Austfjörðum, norður um og allt að Norðvesturmiðum dagana 03. - 25. janúar sl. Útbreiðsla loðnunnar hefur verið könnuð og stærð stofnsins á því svæði verið mæld tvívegis. Útreikningar á stærð veiðistofnsins sem byggja á þessum mælingum sýna að alls mældust 1065 þúsund tonn af kynþroska loðnu í fyrri mælingunni, en 1020 þúsund tonn í þeirri síðari. Að viðbættum afla ársins fram að mælingum er áætlað að stærð veiðistofnsins þann 01. janúar hafi verið um 1070 þúsund tonn.

SSA mótmælir hugmyndum um færslu Reykjavíkurflugvallar

Um árabil hefur umræðan um Reykjavíkurflugvöll verið íbúum dreifbýlisins, þ. e. þeirra er búa utan þéttbýlisradíuss borgarinnar, hugleikin og hefur þeim löngum þótt bera á skilningsskorti; að Reykjavíkurflugvöllur er fyrst og fremst landsbyggðarflugvöllur. Keflavíkurflugvöllur er jú millilandaflugvöllur eyþjóðarinnar. Þeir borgarfulltrúar, þingmenn borgarinnar og pennaglaðir íbúar í andstöðu við núverandi staðsetningu vallarins líta málið yfirleitt allt öðrum augum en við hin en í þessu sambandi er ágætt að rifja upp orð oddvita sveitarfélagsins, sem birtist m. a. á þessum vettvangi - gefum Þórunni orðið:

 

„Nú get ég farið að heiman á Egilsstaði að morgni, tekið flugið suður og farið til baka og alla leið heim um kvöldið ef ég þarf á fund eða sinna öðrum erindum í Reykjavík eins og títt er um þá sem eru í forystu í sveitarstjórnarmálum eða atvinnulífi á landsbyggðinni“. Þetta er mergur málsins og þarf engar frekari skýringar - hefði maður haldið.

Íþróttadagur grunnskólans

Heilbrigð sál í hraustum líkama er göfugt markmið og skv. grunnskólalögum frá 1995 segir m. a.: Grunnskólinn skal leitast við að haga störfum sínum í sem fyllstu samræmi við eðli og þarfir nemenda og stuðla að alhliða þroska, heilbrigði og menntun hvers og eins. Svo greindi heimildarmaður frá á sl. ári og þykir sjálfsagt að endurtaka nú því í morgun var blásið til íþróttadags í grunnskólanum og var líf og fjör í íþróttahúsinu er heimildarmann bar að garði um kl. 09:15. Að venju var myndavélin með í för og er hluta þeirra mynda sem teknar voru að finna meðfylgjandi fréttinni, með misathyglisverðum athugasemdum ljósmyndarans.

Lítil breyting á íbúafjölda á Austurlandi

Ef rýnt er í tölur Hagstofunnar um mannfjöldaþróun á Austurlandi sl. 3, þ. e. 2009, 2010 og 2011, kemur í ljós lítilsháttar breyting á íbúafjölda fjórðungsins. Vopnafjörður hefur á tímabilinu orðið fyrir lítilsháttar fækkun og um árabil hefur íbúum fækkað, voru á 4. ársfjórðungi 2011 670, plús / mínus þar eð um námundun er að ræða. Ýmis teikn eru á lofti að þróunin kunni að vera snúast við, sú mikla vinna sem skapast hefur með uppbyggingu aðstöðu HB Granda hf. er undirstaða aukinna tækifæra því þó velflest störfin krefjist ekki endilega mikillar menntunar eru launin fullkomlega boðleg. Að sjálfsögðu krefst vinnan viðveru en umbunina er að fá í launaumslaginu sem og í fyrirtaks starfsumhverfi, sem er í alla staði til fyrirmyndar.