Af heimasíðu HB Granda má lesa að veiði hafi verið heldur dræm að undanförnu og síldin á stundum illviðráðanleg. Það breytir ekki því að enn er líf við Vopnafjarðarhöfn og því lengur inná haustið sem vertíðin nær gleðjumst við vopnfirðingar. 

Þegar heimildarmaður var á rölti um hafnarsvæðið í gærmorgun bar við augu vinnusamir Mælifellsmenn, sem vinna við að fegra umhverfi HB Granda og verður sómi að þegar því verki er öllu lokið. Framundan er raunar ein byggingin enn á athafnasvæði fyrirtækisins, léttbygging undir hrognaþurrkun framan síldarflökunarhúss. Verið var að afferma Ingunni og meðan hráefnið rann inní Milljón voru lyftarar í óða önn að koma 1400 tonnum frystrar afurðar síldar og makríls um borð í flutningaskipið Green Lofoten.

Á heimasíðu HB Granda, www.hbgrandi.is, má lesa eftirfarandi:

Faxi RE var væntanlegur til Vopnafjarðar síðdegis í gær með um 280 tonn af síld sem fengust í nótt austur af Glettinganesi. Faxi var að veiðum með Ingunni AK og að sögn Hjalta Einarssonar, sem var skipstjóri í veiðiferðinni, hefur leiðinlegt veður sett svip sinn á veiðarnar undanfarna daga og hafa aflabrögðin verið frekar dræm.

,,Það hefur verið erfitt að eiga við síldina vegna veðurs og þá hjálpar það ekki til að síldin liggur við botninn á meðan birtu nýtur en síðan kemur hún upp og dreifir sér þegar það tekur að rökkva. Það er mjög erfitt að lesa í stöðuna. Maður sér ekki mikið en það er samt hægt að hitta á þokkaleg hol. Þennan afla fengum við t.d. á sex tímum í nótt. Við köstuðum á miðnætti og kláruðum holið snemma í morgun,“ segir Hjalti en þrátt fyrir að tíðarfarið hafi verið erfitt síðustu daga þá hjálpar það mikið að stutt er á miðin eða aðeins um 80 sjómílna sigling frá Vopnafirði.

Síldin, sem veiðst hefur síðustu dagana út af Austfjörðunum, er af blandaðri stærð. Lítið er um makríl í aflanum og ekki verður vart við kolmunna á þessum slóðum. Mörg íslensk skip hafa verið að veiðum á svæðinu en ekkert hefur sést til norskra eða færeyskra skipa um skeið.

Í gær var lokið við að vinna úr um 950 tonna afla Ingunnar á Vopnafirði og í morgun lauk síðan vinnslu úr um 220 tonna afla sem Lundey kom með í gær. Lundey er nú á leið á miðin þar sem hún og Ingunn veiða saman með einu stóru trolli og mun Ingunn síðan sigla til hafnar með aflann þegar ásættanlegu aflamagni fyrir vinnsluna er náð.