Vopnfirðingar líkt og aðrir íbúar dreifbýlisins horfa uggandi til framtíðar gangi eftir hugmyndir um þann niðurskurð sem fjárlög komandi árs gera ráð fyrir, þá einkum í heilbrigðiskerfinu. Í tilfellum er málið svo alvarlegt að um hrun byggðar getur verið að ræða, stofnunum er gert að skera niður allt að 40%.

Um allt land hefur verið fundað með þátttöku þúsunda en með öllum ráðum verður að stöðva þá aðför sem gerð er að heilbrigðisþjónustunni – og byggðunum um leið. Því verði þetta látið viðgangast hefur tónninn verið gefinn, byggðirnar munu smám saman gefa eftir og viðnámið brotið á bak aftur. Hver kann að vera ávinningurinn í að gera Ísland óbyggilegt nema á einu svæði – hafa valdhafar velt því fyrir sér hvaða verðmæti munu glatast þegar hver byggðin á fætur annarri hrynur?

Sl. sunnudag kom fólk saman um allan fjórðunginn og mótmælti harðlega fyrirhugðum niðurskurði á framlögum til HSA, sem rekur starfsstöðvar í 11 byggðarlögum. Vopnfirðingar voru engir eftirbátar annarra og sýndu mikla samstöðu en svo margir mættu að tókst að mynda manngerðan múr umhverfis Sundabúð.

Utan Sundabúðar hélt oddviti sveitarfélagsins, Þórunn Egilsdóttir, ræðu og hvatti íbúa til samstöðu - þær hugmyndir sem fjárlögin endurspegla er bein árás á samfélag okkar og önnur í hinum dreifðu byggðum Íslands.

Samkvæmt framlögðum fjárlögum fyrir 2011 hefur verið boðaður um 22 % niðurskurður á heildarframlögum til HSA. Auk þess er fyrirhugaður 52 % niðurskurður á sjúkrasviði stofnunarinnar. Áformin eru ekkert annað en aðför að heilbrigðisþjónustunni á starfssvæði HSA, afhjúpar virðingarleysi heilbrigðisyfirvalda til íbúa í fjórðungnum og skerðir velferðarþjónustu á svæðinu.

Ekki liggur fyrir mat á samfélagslegum áhrifum, sem boðaður niðurskurður mun hafa í för með sér á Austurlandi. Það þarf hins vegar engan sérfræðing til að sjá að áformin muni leiða til aukins atvinnuleysis með tilheyrandi kostnaði fyrir ríkissjóð og íbúafækkunar með tilheyrandi tekjutapi fyrir sveitarsjóði. Þá er ótalinn sá öryggisþáttur sem skert aðgengi að heilbrigðisþjónustu í heimabyggð er, að ógleymdum auknum kostnaði íbúanna við að sækja þjónustu um lengri veg.

Á síðasta aðalfundi SSA, 24.-25. september sl., voru eftirfarandi ályktanir samþykktar:

Ályktun um heilbrigðisþjónustu.
44. aðalfundur SSA haldinn á Breiðdalsvík 24. og 25. september 2010, skorar á yfirvöld heilbrigðis- og fjármála, og ríkisstjórn Íslands, að standa vörð um þá heilbrigðisþjónustu sem nú er veitt í landsfjórðungnum. Fundurinn leggur áherslu á að haldið verði áfram að efla og styrkja heilbrigðiskerfið á Austurlandi sem einn mikilvægasta grunnþátt nauðsynlegrar þjónustu við íbúa á svæðinu, ekki síst á jaðarsvæðum þar sem samgöngur eru erfiðar. Íbúar Austurlands eiga skýlausan rétt, samkvæmt lögum á góðu aðgengi að úrvals heilbrigðisþjónustu, eins og aðrir landsmenn.

Heilbrigðisstofnun Austurlands (HSA)
44. aðalfundur SSA haldinn á Breiðdalsvík 24. og 25. september 2009 skorar á Alþingi, fjárveitingavaldið og yfirvöld heilbrigðismála að sjá til þess að fjárframlög til stofnunarinnar taki mið af raunverulegri starfsemi hennar og getu. Heilbrigðisstofnun Austurlands (HSA), hefur þrátt fyrir niðurskurð á fjárframlögum á síðustu misserum tekist að halda uppi nauðsynlegri þjónustu, en vegna takmarkanna á samnýtingu starfsfólks og aðstöðu eiga heilbrigðisstofnanir í dreifbýli erfiðara með að svara kalli um hagræðingu og lækkun útgjalda en sambærilegar stofnanir sem starfa í þéttbýli. Heilbrigðisstofnun Austurlands hefur á undanförnum árum, með aukinni tækjavæðingu, getu og tiltrú á stofnunina, orðið færari um að sinna stærri hluta þeirrar heilbrigðisþjónustu sem áður var sinnt á höfuðborgarsvæðinu, með tilheyrandi tilkostnaði ríkisins og þeirra íbúa sem á þjónustunni þurfa að halda, enda er það þjóðhagslega hagkvæmt að sem mest af heilbrigðisþjónustunni sé veitt í nærumhverfi með staðbundinni grunnþjónustu og farandsérfræðingum.