Í gær var tendrað á ljósum jólatrésins, munum við birta myndir frá viðburðinum hér á síðunni ásamt myndum úr kaffihúsi kvenfélagsins síðar í dag, en viðburðurinn stendur uppá fyrsta sunnudag í aðventu að venju. En hvað er aðventa?

Aðventa - úr latínu;  „koman“ eða „sá sem kemur“ - er í kristni fjórir síðustu sunnudagar fyrir jóladag og er annað heiti fyrir jólaföstu. Beri jóladag uppá sunnudag verður hann fjórði sunnudagurinn í aðventu. Fyrsti sunnudagur í aðventu er jafnframt fyrsti dagur nýs kirkjuárs í Vesturkirkjunni, sem við tilheyrum.

Í mörgum löndum er haldið upp á aðventuna með aðventukrönsum, sem bera fjögur kerti, eitt fyrir hvern sunnudag aðventunnar. Á síðari árum hefur líka orðið algengt að kveikja á aðventustjökum frá fyrsta sunnudegi í aðventu.

Kertin bera heiti en hefðin er norður-evrópsk og hefðbundinn krans með greni er skilgreindur svo:

Aðventukransinn byggist á norður-evrópskri hefð. Hið sígræna greni táknar lífið sem er í Kristi og hringurinn táknar eilífðina. Fyrsta kertið nefnist spádómakertið og minnir á fyrirheit spámanna Gamla testamentisins er höfðu sagt fyrir um komu frelsarans. Annað kertið nefnist Betlehemskertið. Þar er athyglinni beint að þorpinu sem Jesús fæddist í, og þar sem ekkert rúm var fyrir hann. Þriðja kertið nefnist hirðakertið en snauðum og ómenntuðum fjárhirðum voru sögð tíðindin góðu á undan öllum öðrum. Fjórða kertið nefnist síðan englakertið og minnir okkur á þá sem báru mannheimi fregnirnar.