Vopnfirðingar hafa um langt árabil lagt áherslu á Hellisheiðargöng, á þörfina að tengjast þjóðvegakerfi landsins á láglendi. Með slíkum göngum kæmust íbúar í suðurátt um láglendisveg en eftir sem áður er uppá hálendi að fara vilji menn norður, um það breyttu göng engu. Vopnfirðingar njóta þeirra kosta að að hafa val um hálendið og strandleiðina norður, hvar Sandvíkurheiðin er yfirleitt helsta hindrunin á þeirri leið. Þessa kosta njóta Seyðfirðingar t. a. m. ekki og í ljósi þess að illa hefur viðrað sl. vikur hefur bæjarstjórn sent frá sér ályktun.

Við vopnfirðingar hljótum að líta til meðbræðra okkar og systra, sem búa við enn verri samgönguaðstæður en við; vegurinn er einungis einn um háan fjallveg og enginn er þar flugvöllurinn. Meðfylgjandi er ályktun bæjarstjórnar Seyðisfjarðar, undirrituð af forseta hennar, Arnbjörgju Sveinsdóttur. Er ekki annað hægt en að taka heils hugar undir kröfur Seyðfirðinga nú þegar hyllir undir að þjóðvegurinn um Vesturárdal verður orðinn að fullmótuðum heilsársveg og samgöngur þar með stórum bættar þó enn bóli ekki á Hellisheiðargöngum.

Ályktun bæjarstjórnar Seyðisfjarðar - frétt á heimasíðu sveitarfélagsins, www.sfk.is:

Tíðar lokanir á Fjarðarheiði síðustu vikur.  Bæjarstjórn segir óviðunandi að Seyðfirðingar búi við áframhaldandi óvissu um gerð jarðganga undir Fjarðarheiði.  Bæjarstjórn Seyðisfjarðar samþykkti í gær eftirfarandi ályktun um samgöngumál í ljósi tíðra lokana og erfiðra aðstæðna á veginum yfir Fjarðarheiði síðustu vikur: "Það ástand sem verið hefur í samgöngum við Seyðisfjörð að undanförnu undirstrikar þá kröfu Seyðfirðinga að samgönguyfirvöld setji gerð jarðganga undir Fjarðarheiði á áætlun og í framkvæmd við fyrsta tækifæri. Ekki er á neinn hallað þó fullyrt sé að ekkert byggðarlag hér á landi býr nú við jafn miklar truflanir og jafnvel einangrun að vetrarlagi og Seyðisfjörður. Tölur tala sínu máli þar um.

Frá 10. nóvember hefur Vegagerðin aðeins skráð Fjarðarheiði greiðfæra 8 sinnum og dögum saman hefur verið snjóþekja og hálka á heiðinni - ellegar hún með öllu ófær. Á þeim 12 sólarhringum sem liðnir eru frá áramótum hefur Fjarðarheiðin verið skráð ófær alls 11 daga, að hluta eða öllu leyti. Þetta segir allt sem segja þarf um það óöryggi og truflanir á daglegu lífi Seyðfirðinga sem þessum erfiða fjallvegi fylgja. Sínu alvarlegust er sú ógn sem tíðar lokanir Fjarðarheiðar eru fyrir öryggisþjónustu á heilbrigðissviðinu og ekki þarf að fjölyrða um þá truflun sem verður á aðföngum og atvinnustarfsemi við þessar aðstæður. Það er því miður aðeins tímaspursmál hvenær sú staða kemur upp að Fjarðarheiði hindri aðgengi að hátækniheilbrigðisþjónustu og flugvelli, þegar mest liggur við.

Bæjarstjórn brýnir fyrir Alþingi, ríkisstjórn og samgönguyfirvöldum að binda endi á áratuga bið Seyðfirðinga eftir þeirri ákvörðun að setja Fjarðarheiðargöng á dagskrá og vinna að framgangi þess máls. Við svo búið verður ekki unað öllu lengur.
Seyðfirðingar lýsa sig reiðubúna til viðræðna um að veggjöld verði liður í fjármögnun Fjarðarheiðarganga, geti það orðið til að flýta fyrir ákvörðun um gerð þeirra."

Fréttatilkynning frá Seyðisfjarðarkaupstað, 13. janúar 2011

Frekari upplýsingar:
Arnbjörg Sveinsdóttir, forseti bæjarstjórnar