Í forystugrein Sveitarstjórnarmála, tímariti Sambands íslenskra sveitarfélaga, skrifar formaður sambandsins, Karl Björnsson, grein sem hann kallar "Ísland 2020 - sóknarfæri fyrir sveitarfélögin". Segir Karl í grein sinni að sóknaráætlunin Ísland 2020 feli í sér tækifæri sem ekki hafa boðist sveitarfélögum í langan tíma. Í raun sé um að ræða eitt stærsta skref sem stigið hefur verið í byggðamálum á Íslandi í áratugi.

Sóknaráætlunin Ísland 2020 var samþykkt af ríkisstjórninni fyrir skömmu. „Í sóknaráætlunum fyrir hvern landshluta skal taka mið af þeirri svæðaskiptingu sem ákveðin var í undirbúningsvinnunni sem miðar við núverandi starfssvæði landshlutasamtaka sveitarfélaga,“ segir Karl í forystugrein sinni.

„Forgangsröðun einstakra verkefna á hverju svæði verður á hendi heimamanna. Skilgreindur verður sameiginlegur vettvangur sveitarstjórna, fulltrúa atvinnulífs og stofnana á hverju svæði sem komi í stað hinna ýmsu stjórna og nefnda sem koma að málum í núverandi skipulagi.“

Í áætluninni eru sett fram framtíðarsýn og leiðarljós fyrir áætlanagerð hins opinbera til næstu ára. Samhliða verður hafin vinna við að sameina stefnumótun og áætlanir í langtíma fjárfestingaráætlun og sóknaráætlanir landshluta. Í áætlunum felast gríðarleg sóknarfæri  fyrir sveitarfélög og landshlutasamtök þeirra að mati formanns.

Verkefnið felst í að samþætta áætlanir og setja fram tillögur að forgangsröðun verkefna. Tekið er á mörgum þáttum, s. s. svæðisskipulag, eflingu sveitarfélaga með auknum verkefnum, sjálfbæra nýtingu orku og auðlinda á viðkomandi svæði. Einnig um uppbyggingu grunnnets samgangna og eflingu almenningssamgangna. Að auki um öruggt aðgengi að háhraðafjarskiptum, einföldun og endurskipulagningu á stoðkerfi atvinnu- og byggðaþróunar á viðkomandi svæðum, samstarf milli menntastofnana annars vegar og þekkingar- og nýsköpunarmiðstöðva hins vegar á hverju svæði og margt fleira.

Um sé að ræða einföldun, fækkun og samþættingu lögbundinna stefna og áætlana með það að markmiði að auka yfirsýn og bæta vinnubrögð, m.a. með því tengja stefnumótun og áætlanagerð ráðuneyta betur við undirbúning fjárlaga og tryggja að árangursmat og eftirlit sé alltaf fyrir hendi. Í þessu samhengi má m. a. nefna samgönguáætlun, samskiptaáætlun, byggðaáætlun, ferðamálaáætlun, heilbrigðisáætlun, löggæsluáætlun, skipulagsáætlun, náttúruverndaráætlun, orkustefnu, menntastefnu, og rammaáætlun um vernd og nýtingu náttúrusvæða, segir ennfremur í grein Karls en velta má fyrir sér hvort hann sem aðrir sjái fyrir sér stærri sveitarfélög en t. a. m. okkar í þessu samhengi.