Í dag er 17. júní, þjóðhátíðardagur lýðveldisins - fæðingardagur Jón Sigurðssonar forseta. Í ár eru 200 ár frá fæðingu frelsishetjunnar frá Hrafnseyri við Arnarfjörð en Jón er óumdeildur leiðtogi Íslendinga í frelsisbaráttu þeirra á 19. öld. Til þess að minnast Jóns var fæðingardagur hans valinn sem sá dagur sem Háskóli Íslands var stofnaður árið 1911 og sem þjóðhátíðardagur Íslendinga þegar Lýðveldið Ísland var stofnað þann 17. júní árið 1944.

Til hamingju með daginn, Íslendingar!

Vopnfirðingar sem aðrir fagna þjóðhátíð, Ungmennafélagið Einherji heldur utan um hátíðardagskrána að vanda en allt útlit er fyrir að hátíðarhöldin verði að færa í íþróttahúsið þar sem ekki viðrar til útiveru. Er það saga sl. mánaðar, hvorki meira né minna, en ekki er ástæða til að láta hugfallast heldur horfa með jákvæðni til dagsins og leggja sig fram um að njóta hans. Dagskráin er svofelld:

Kl. 08:00  Fánar dregnir að húni – þjóðhátíðardegi lýðveldisins heilsað

Kl. 11:00 Hátíðarmessa að Hofi

Kl. 12:00 Súpa og brauð í Hjáleigunni kr. 1.300 að lokinni messu. Opið allan daginn í Bustarfelli – konur í þjóðbúningi frítt inn á safnið

Kl. 13:30  Skrúðganga frá félagsheimilinu Miklagarði að skólalóð

Kl. 14:00  Hátíðardagskrá á skólalóð/sparkvelli.  Hefðbundin dagskrá ásamt léttum leikjum. *Athugið: Leyfi veður ekki verður dagskrá flutt í íþróttahúsið.

Kl. 16.00  Hátíðarkaffi í félagsheimilinu Miklagarði.  Verð kr. 1.500,- fyrir fullorðna, 500,- fyrir börn 6-12 ára

Nú er um að gera að taka fram sparifötin og taka að fullu þátt í þjóðhátíðardagskránni.

Um Jón Sigurðsson forseta:

Einn helsti samstarfsmaður Jóns var nafni hans Jón Guðmundsson, ritstjóri. Hann var stundum kallaður skuggi Jóns Sigurðssonar.

Konungur Danmerkur afsalaði sér einveldi árið 1848 og við það tækifæri ritaði Jón „Hugvekju til Íslendinga“ þar sem hann hvatti Íslendinga til baráttu fyrir sjálfstæði. Greinin birtist í Nýjum félagsritum það ár. Rök hans voru þau að við afnám einveldisins væri Ísland orðið að sjálfstæðu landi, líkt og fyrir Gamla sáttmála. Á þjóðfundinum 1851 lagði hópur Íslendinga fram mótfrumvarp við frumvarp Danakonungs um stjórnskipun Íslands.

Jørgen Ditlev Trampe, stiftamtmaður Danakonungs á Íslandi, neitaði frumvarpinu framgöngu og brást þá Jón við og mótmælti framgöngu Trampe. Undir tóku viðstaddir með hinum fleygu orðum „Vér mótmælum allir“. Þessi atburður er talin marka þau tímamót að þaðan af var Jón talinn óumdeildur leiðtogi sjálfstæðisbaráttunnar. Eftir þjóðfundinn ganga sögur um að dönsk yfirvöld vildu ráða Jón af dögum en seinni rannsóknir benda til þess að ekkert sé til í því.

Jón beitti sér fyrir verslunarfrelsi. m.a. með útgáfu ritgerðar um verslun á Íslandi sem kom út árið 1843 þar sem hann vísar í verk Adam Smiths. Þrátt fyrir afnám einokunarverslunar 1787 var verslun við aðra en þegna Danakonungs áfram bönnuð.