Hlaupið í þágu friðar, Friðarhlaupið 2011, náði Vopnafirði í gær um hádegisbil, þriðjudaginn 12. júlí, og var Einar Björn mættur til að taka á móti hópnum í blíðviðri. Svo sem áður hefur frá verið greint á þessum vettvangi er Friðarhlaupið (World Harmony Run) alþjóðlegt kyndilboðahlaup, stofnað af Sri Chinmoy árið 1987. Tilgangur hlaupsins er að efla frið, vináttu og skilning og hefur nú verið hlaupið í rúmlega 100 löndum síðustu 24 árin. Eins og ástatt er á jarðarkringlunni verður aldrei ofreynt þegar koma skal friðarboðskapnum á framfæri.

Og meira um þetta merkilega fyrirbæri:

Það er alþjóðlegt lið sjálfboðaliða sem skipuleggur og sér um að hlaupa með kyndilinn á milli landa. Fólk á öllum aldri og af öllum stéttum og stigum tekur þátt í Friðarhlaupinu hvar sem það stingur niður fæti.

Í ár verður hlaupið hringinn í kringum Ísland, 05.-22. júlí, en þá munu 20 hlauparar frá 13 þjóðlöndum hlaupa með Friðarkyndilinn.

Ísland hefur tekið þátt í hlaupinu frá upphafi. Steingrímur Hermannsson, þáverandi forsætisráðherra, setti fyrsta hlaupið árið 1987 og í lokaathöfninni það árið sameinuðust leiðtogar allra stjórnmálaflokkanna um kyndilinn. Í forsetatíð sinni var Vigdís Finnbogadóttir verndari Friðarhlaupsins.

Talsmaður Friðarhlaupsins er nífaldur gullverðlaunahafi Ólympíuleikanna, Carl Lewis. Meðal annarra sem stutt hafa hlaupið má nefna Nelson Mandela, Móður Teresu, Mikhail Gorbachev og Muhammed Ali.

Friðarhlaupið safnar ekki fé og leitar ekki eftir stuðningi við pólitískan málstað. Markmið hlaupsins er einfaldlega að auka meðvitund um að friður, vinátta og skilningur hefst í hjarta hvers og eins.