Heimildarmaður greindi frá því í gær að hann hafi notið forréttinda að rölta á Fuglabjarganes á einum blíðvirðisdegi septembermánaðar. Svo mikið fannst honum til koma að myndasyrpa gærdagsins dugði einungis til að sýna það sem fyrir augu bar á leið hans að nesenda þar sem stórbrotin sviðsmyndin er sú umbun ein sem hægt er að láta sig dreyma um á göngu sem þessari.

Það sem maður elst upp við verður hið stórfenglega hluti af umhverfi hlutaðeigandi en fyrir þann sem ekki þekkir til dylst mikilfengleikinn ekki. Ferðamanninum er það kappsmál, viti hann af náttúrufyrirbærinu, að bera það augum, mynda, njóta – og þá helst í samfélagi við aðra sem deila upplifuninni með honum. Sagan af manninum sem ólst upp steinsnar frá Eiffel-turninum heimsfræga og fór aldrei upp í hann af því að hann var alltaf til þarna er vel þekkt.

Nú er kunnátta þess sem um lyklaborðið heldur á náttúru lands og þessa heims rétt liðlega barnaskólatæk og er þekkingin á Fuglabjarganesi engin undantekning. En aðrir vita betur og rétt að leyfa öðrum að njóta og í greinargerð aðalskipulags Vopnafjarðar segir m. a.: Á Austurlandi er blágrýtismyndun talin vera um 10.000 metrar að þykkt. Vopnafjörður og Skeggjastaðahreppur ásamt fjöllum Langaness heyra til blágrýtismyndunar landsins og eru þau vesturjaðrar Austurlandsblágrýtisins. … Jarðsögulega séð er Vopnafjarðarsvæðið að drjúgum hluta á tertíerum blágrýtisgrunni eða síðtertíerum grágrýtisgrunni, sem er eldri en 700 þúsund ára … (HG).

Með þetta í huga er ágætt að rölta um landið þó fyrir leikmanninn segi slíkar upplýsingar harla lítið því fyrst og síðast er það augað sem nemur þá fegurð sem við blasir og hana er sannarlega að finna á Fuglabjarganesi – sandur er sandur og berg er berg. Víðáttan þegar niður á nesið er komið er mögnuð þó svæðið sé í sjálfu sér ekki stórt en í samanburði við eina smáa manneskju eru yfirburðirnir augljósir. Það kemur ekki á óvart að strandlengjan og fjörur við Fuglabjarganes eru svæði á náttúruminjaskrá. Svæði, sem nær frá Litluá að Hámundarstöðum, en það er fögur og fjölbreytt strönd með mikið fuglalíf. Bjargfugl er einkum að finna í Strandhafnarbjörgum Fuglabjarganesi og hömrum Vindfells, segir í greinargerð með aðalskipulagi Vopnafjarðarhrepps.

Í stuttu máli er hægt að lýsa svæðinu svona: Fögur og fjölbreytt strönd, mikið fuglalíf. Leiðin er einkar athyglisverð, stikuð gönguleið. Nesið er við landamerki Ljósalands og Hámundarstaða (sem er ágætt að vita), merkt gönguleið af Strandhafnarvegi, gengið niður með ánni Fuglu. Slétt nesið er með fjárborgum, hvítum eða ljósum fjörum, dröngum og stórbrotnum björgum. Einfaldlega svona og leiðin ekki lengri en svo að fólk í þokkalegu líkamlegu ástandi fer tiltölulega auðveldlega um. Umbun er lofað svo sem myndasyrpan ber með sér, velkomin á Fuglabjarganes.