Í dag kl. 17:00 hefst svo kölluð Björgvinshátíð í Kaupvangskaffi þar sem tónskáldsins Björgvins Guðmundssonar frá Rjúpnafelli í Vesturárdal í Vopnafirði, hvar hann fæddist 26. apríl árið 1891. Frá Akureyri kemur valinn hópur með efni til hátíðarinnar en á sl. vori var mikil dagskrá í menningarhúsinu Hofi á Akureyri – kemur hópurinn til með að sýna mynd frá þeim viðburði að afloknu kaffihléi.

Í upphafi dagskrár mun vertinn í Kaupvangskaffi, Ágústa Þorkelsdóttir, setja hátíðina og mun gera það með sínum einstaka hætti. Síðan er dagskráin þessi:

120 ára árstíð Björgvins Guðmundssonar: Þorsteinn Gunnarsson

Sögusýning um Björgvin Guðmundsson: Haraldur Sigurðsson

Líf og list Björgvins Guðmundssonar: Haukur Ágústsson

Upplestur úr ævisögu Björgvins Guðmundssonar. Ferill til frama: Fanney Hauksdóttir

Kaffihlé

Sýnd kvikmynd um Björgvinshátíð sem haldin var í Hofi á Akureyri 10. apríl sl.

Aðeins um Björgvin:

Björgvin var næst yngstur 6 systkyna: Anna Sigríður, fædd 3. desember  1876; Jóna, fædd  15. maí 1878; Þorsteinn, fæddur 14. janúar 1884; Páll, fæddur 25. júní 1887; Björgvin, 26. apríl 1891 og árið 1893 fæddist Árni, en hann lést nokkurra vikna.

Öll börnin fæddust á Íslandi, en strax, vorið 1879 höfðu hjónin hug á að flytjast til Ameríku og höfðu í þeim tilgangi selt allar eigur sínar hér á landi. En svo bárust greiðslur seint fyrir eigurnar að þau urðu að hætta við ferðina. Settust þau fyrst að á Hauksstöðum og síðar að Mælifelli vorið 1880. Þar stunduðu þau búskap í sjö ár en árið 1887 fluttust þau að Rjúpnafelli þar sem þau bjuggu þar til Anna Margrét, þá orðin ekkja, fluttist vestur um haf mörgum árum síðar ásamt sonum sínum.

Þeir feðgarnir, Björgvin og Guðmundur deildu áhuganum á sönglistinni, enda faðir Guðmundur forsöngvari í Hofskirkju um árabil áður en orgel kom í kirkjuna.. Guðmundur hélt uppi heilisguðsjónustum á sínu heimili á hverjum degi allan veturinn, og á sunnudögum á sumrin, og hélt hann þar uppi forsöngnum, þar til Björgvin var orðinn tólf ára gamall, en vegna þungra veikinda Guðmundar, tók Björgvin þá við.

Heima á Rjúpnafelli bjuggu árið 1911 Anna Margrét, ekkja Guðmundar og bræðurnir Þorsteinn, Páll og Björgvin. Fjölskyldunni var vel kunnugt um tónlistaráhuga og – hæfileika Björgvins og hefur það ekki síst verið vegna stuðnings Þorsteins við þennan áhuga Björgvins að fjölskyldan fluttist vestur um haf vorið 1911, ekki síst til að Björgvin gæti lagt stund á frekara tónlistarnám.  Föstudaginn 7. júlí árið 1911 steig fjölskyldan á skip á Vopnafirði og hóf ferð sína til Ameríku. Jörðinni hafði verið sagt lausri, allt lausafé selt og þar með orgelið góða, og vinnufólki komið annarsstaðar fyrir. Björgvin Guðmundsson var á leið í tuttugu ára ferðalag, sveitapiltur úr Vopnafirði, fullur áhuga og hæfileika í tónlist, var orðinn slark læs í þeim bókmenntum, og átti eftir að snúa heim árið 1931 sem heimsmaður á sviði tónlistarinnar, ekki síst miðað við marga þá sem þá bjuggu hér á landi og störfuðu að tónlist.

Síðan taka við árin í Kanada.