Fyrsti dagur þorra er nefndur bóndadagur en sá síðasti þorraþræll. Þann 20. janúar n. k. hefst samkvæmt gamla norræna tímatalinu þorrinn, sem er fjórði mánuður vetrar og hefst sem fyrr greinir á bóndadegi á föstudegi í 13. viku vetrar, sem getur verið á bilinu 19. – 26. janúar - stendur uppá 20. að þessu sinni. Þorranum lýkur á þorraþræl sem er laugardagurinn fyrir konudag og tekur þá góa við.
Að vanda munu Vopnfirðingar halda sitt þorrablót í félagsheimilinu Miklagarði, laugardaginn 21. janúar n. k. Þarf ekki að orðlengja að mæting á blót er skylda hvers manns sem á annað borð vill njóta samvista við gott fólk, snæða eftir föngum góðan mat - alltént öðru vísi en við erum að snæða aðra daga ársins - að ógleymdu áramótauppgjörinu, skaupinu okkar, á sviði félagsheimilisins. Þorrblótsnefnd hefur þegar sent í hvert hús sveitarfélagsins skemmtilegt flygildi með upplýsingum um komandi skemmtan, hún er að sjálfsögðu hefðbundin í forminu en sumt er með þeim hætti að því á ekki að breyta ... nema að litlu leyti frá ári til árs. Hlakkar þann er þetta ritar ávallt til þorrablóts með dægilegu balli á eftir.
Rétt er að hafa í huga að miðasala er á þriðjudag 17. janúar milli kl. 16:00-18:00 og á sama tíma á miðvikudag - og ákvarðast af miða hvar hver og einn situr. Miðaverð er krónur 8.500,- fyrir mat, skemmtan og ball. Nú er um að gera að haka við þriðju- eða miðvikudaginn og koma sér svo í Miklagarð og höndla miða á viðburðinn (ómissandi). 
Í íslenskri Orðsifjabók segir að orðið þorri (miðsvetrarmánuður) sé oftast tengt sögninni að þverra en einnig að það sé hugsanlega skylt lýsingarorðinu þurr. Orðið á sér samsvörun í öðrum norrænum tungum, svo sem færeysku, torri, og nýnorsku torre. Eðlilega hefur þorraheitið lifað lengst í hugum samtímafólks enda heitið fastbundið þorrablótum landsmanna, sem lifa enn góðu lífi en fátt hefur mátt lifa af því sem áður einkenndi íslenska þjóð enda hún upptekin við ný gildi, svona að mestu.
Um fyrsta dag Þorra segir í bréfi Jóns Halldórssonar í Hítardal (f. 1665) til Árna Magnússonar frá árinu 1728, að sú hefð sé meðal almennings að húsmóðirin færi út kvöldið áður og bjóði þorrann velkomin, og inn í bæ, eins og um tignann gest væri að ræða.
Eins segir í Þjóðsögum Jóns Árnasonar að bóndi skyldi bjóða þorra velkomin með eftirfarandi hætti:
... með því að þeir áttu að fara fyrstir á fætur allra manna á bænum þann morgun sem þorri gekk í garð. Áttu þeir aða fara ofan og á skyrtunni einni, vera bæði berlæraðir og berfættir, en fara í aðra skálmina og láta hina lafa og draga hana á eftir sér á öðrum fæti, ganga svo til dyra, ljúka upp bæjarhurðinni, hoppa á öðrum fæti í kringum bæinn, draga eftir sér brókina á hinum og bjóða þorra velkomin í garð eða til húsa. Síðan áttu þeir að halda öðrum bændum úr byggðarlaginu veislu fyrsta þorradag; þetta er „að fagna þorra“.