Frá því er greint á heimasíðu Hafrannsóknastofnunar, www.hafro.is, að loðnumælingar hafi staðið frá 03. janúar síðastliðnum en auk rannsóknaskipsins Árna Friðrikssonar tóku 12 loðnuveiðiskip þátt í að leita loðnunnar dagana 03.-05. janúar. Hafrannsóknarskipið var við mælingar lengur eða fram til 13. Fyrir samfélagið í heild sinni varðar miklu að vel veiðist en sjávarútvegsráðherra, Steingrímur J. Sigfússon, gerir sér vonir um 20-25 milljarða loðnuvertíð og bætt verði við upphafkvótann, sem er 366 þúsund tonn, allt að 200 þúsund tonnum.

Þáttur Vopnfirðinga er ávallt verulegur en heildarafli loðnuskipa HB Granda á síðustu vertíð var 61 þúsund tonn. Skiptist þetta magn nokkurn veginn til helminga á milli Akraness og Vopnafjarðar. Árið áður bárust tæplega 21.600 tonn af loðnu til þessara tveggja staða, svo mikil var aukningin á milli ára. Alls voru fryst 9000 tonn loðnuafurða á þessum stöðum á síðustu vertíð.

Mælingar á Árna Friðrikssyni hófust djúpt austur úr Héraðsflóa og náðu til svæðisins þar norðan við.

Loðna fannst á öllu mælingasvæðinu en var víða dreifð. Austast á svæðinu, og allt vestur að svæðinu norðan við Grímsey var nánast eingöngu um hrygningarloðnu að ræða, en þaðan og vestur að var loðnan blönduð við ókynþroska loðnu. Vestast á svæðinu var eingöngu að finna ókynþroska, tveggja ára loðnu.

Ráðgjöf Hafrannsóknastofnunarinnar um aflahámark á loðnu byggir á tveggja þrepa aflareglu, sem gerir ráð fyrir því að 400 þús. tonn séu skilin eftir til hrygningar í lok vertíðar. Fyrra þrepið er að reikna út leyfilegan hámarksafla, sem byggir á niðurstöðum úr bergmálsmælingum ungloðnu að hausti, ári áður en hún kemur í veiðistofninn. Í ljósi óvissu um afdrif loðnu frá þeim tíma sem hún er mæld sem ungloðna og fram að hrygningartíma hefur verið miðað við að útgefið aflamark væri einungis hluti þess sem spálíkanið gerir ráð fyrir.

Byggt á þeim mælingum, þ. e. ungloðnumælingum haustið 2010, lagði Hafrannsóknastofnunin til að upphafskvóti vertíðarinnar 2011/2012 yrði 366 þús. tonn eða helmingur þess sem spálíkanið gerði ráð fyrir, 732 þús. tonn.

Síðara þrep í gildandi aflareglu er að mæla hrygningarstofn sömu árganga á vertíðinni þegar þeir eru komnir í veiðina og reikna leyfilegan hámarksafla, sem gerir áfram ráð fyrir að 400 þús. tonn séu skilin eftir til hrygningar í lok vertíðar.

Eins og að ofan greinir hefur rannsóknarskipið Árni Friðriksson nú lokið fyrstu yfirferð yfir útbreiðslusvæði hrygningarstofns loðnu, en til að taka tillit til göngu loðnunnar er fyrirhugað að fara í viðbótaryfirferð yfir svæðið og er Árni Friðriksson nú kominn austur fyrir land í þessu skyni.

Þar sem skipulag veiða er mjög svo háð áætluðu heildarmagni, sem heimilt er að veiða á vertíðinni og óvíst er hvenær mælingum lýkur, telur Hafrannsóknastofnunin nauðsynlegt að fram komi að fyrsta yfirferð og mælingar nú benda til þess að veiðistofninn á yfirstandandi vertíð sé af svipaðri stærðargráðu og spár á síðasta ári gerðu ráð fyrir eða tæp 900 þúsund tonn (metin skekkjumörk mælingarinnar 25%). Ráðgjöf stofnunarinnar um heildaraflamark fyrir vertíðina 2011/2012 mun liggja fyrir síðar í mánuðinum að loknum mælingum Árna Friðrikssonar.