Ef rýnt er í tölur Hagstofunnar um mannfjöldaþróun á Austurlandi sl. 3, þ. e. 2009, 2010 og 2011, kemur í ljós lítilsháttar breyting á íbúafjölda fjórðungsins. Vopnafjörður hefur á tímabilinu orðið fyrir lítilsháttar fækkun og um árabil hefur íbúum fækkað, voru á 4. ársfjórðungi 2011 670, plús / mínus þar eð um námundun er að ræða. Ýmis teikn eru á lofti að þróunin kunni að vera snúast við, sú mikla vinna sem skapast hefur með uppbyggingu aðstöðu HB Granda hf. er undirstaða aukinna tækifæra því þó velflest störfin krefjist ekki endilega mikillar menntunar eru launin fullkomlega boðleg. Að sjálfsögðu krefst vinnan viðveru en umbunina er að fá í launaumslaginu sem og í fyrirtaks starfsumhverfi, sem er í alla staði til fyrirmyndar.

Ekki einungis eru teikn um að viðsnúning í þéttbýli Vopnafjarðar heldur er fólki tekið að fjölga í dreifbýli sveitarfélagsins, sem eru að sjálfsögðu einkar ánægjulegar fregnir en það er langt í frá sjálfgefið að ungt fólk kjósi búsetu í dreifbýli eins og þróunin hefur verið á Íslandi umliðna áratugi. Allt hjálpast að verði þróuninni snúið við, með nýju fólki koma ný viðhorf og hugmyndir, nýtt vinnuafl sem kallar á þjónustu frá hendi sveitarfélagsins og annarra þjónustuaðila í sveitarfélaginu. Mikilvægt er að vel sé á móti öllum tekið því lengi býr að fyrstu gerð.

Svo sem áður greinir eru litlar breytingar á íbúafjölda Austurlands á 3ja ára tímabilinu miðað við námundaðar tölur Hagstofunnar, sem brátt sendir frá sér nákvæmari tölur hér að lútandi. Þannig voru íbúar fjórðungsins samtals 10.360 á 4ða ársfjórðungi 2009 og 10.210 2 árum síðar. Eru það stóru sveitarfélögin tvö, Fjarðabyggð og Fljótsdalshérað, sem halda sínu ásamt Djúpavogi en smávægileg fækkun í öðrum sveitarfélögum. Sveitarfélagið Hornafjörður er að sjálfsögðu ekki í þessum tölum enda ekki lengur aðili að SSA.

Þegar aðeins er litið á innanlandsflutninga að öðru leyti lá straumurinn frá öllum landsvæðum til höfuðborgarsvæðisins og Suðurnesja. Sem er gömul saga og ný. Þangað fluttu alls 682 umfram brottflutta til annarra landsvæða. Hlutfallslega var flutningsjöfnuðurinn óhagstæðastur á Norðurlandi vestra og Vestfjörðum, Suðurlandi og Vesturlandi en brottfluttir til annarra landsvæða voru litlu fleiri en aðfluttir á Austurlandi og Norðurlandi eystra.

Á hinn bóginn voru þeir langflestir sem fluttust til útlanda af höfuðborgarsvæðinu og Suðurnesjum eða 1.280 alls af 1.404. Fleiri fluttust til útlanda frá öðrum landsvæðum en komu, nema á Austurlandi og Vesturlandi. Þegar litið er til bæði innanlands og utanlandsflutninga var Austurland eina landsvæðið sem kom út með jákvæðan flutningsjöfnuð árið 2011 en þangað fluttu 4 fleiri en fluttu brott.