Öðru hverju hafa hér á síðunni birst fregnir af veðrabrigðum íslensks vetrar – vors, sumars eða hausts ef því er að skipta. Hver minnist ekki síðastliðins vors þegar ríkti vetur fram í júní og í kjölfarið fylgdi sumar er samanstóð af fáeinum dögum – svo virðist sem af nógu sé að taka. Þann 16. janúar sl. hvarf því sem næst allur snjór um skamman tíma, þann 21. tók að snjóa poppkornum og ekki snjó eins myndarleg snjókornin voru sem til jarðar féllu. Allt frá í nóvember hefur gengið á slíkum veðraköflum þar sem snjór fellur, í kjölfarið hlýindi sem brætt hafa snjóinn að hluta en bara hluta og myndað svell staðið hafa um hríð með tilheyrandi hættu fyrir fótgangandi jafnt sem akandi.

Í gærmorgun fór hitamælirinn í 15°C á Skjaldþingsstöðum, 29. janúar vel að merkja, en þetta hitastig var sjaldséð allt sl. sumar hvort sem fólk minnist þess eður ei. Einar Sveinbjörnsson, veðurfræðingur, gerði býsna góða tilraun til að einfalda ferlið svo almenningur mætti skilja hvers vegna veturinn hefur verið eins og hann er í Landanum á RUV í gærkvöldi en nú bregður svo við að Suðurland fær hvern snjódaginn af öðrum meðan Norður- og Austurland eru hlémegin veðurs. Hafi verið um veður fjallað á þessum vettvangi er það hlálegt lítið miðað við stóru fréttastöðvarnar á suð-vestur horni landsins en fréttamönnum sem öðrum er brugðið enda vart viðrað til vetrar syðra um langt árabil. Segir það allt að vart hefur tekið því að tendra á lyftum Bláfjalla vetur eftir vetur meðan nú er snjóalög slík að minnir meira á Týról en sunnlenskt fjalllendi.

Nú er landið nær vori yfir að líta, framundan hlýindi út vikuna svo leggja má gormum og broddum þeim sem prýtt hefur skófatnað Vopnafirðinga og annarra landsmanna er kosið hafa öryggið umfram áhættuna. Ekki er eins einfalt að eiga við blessuð eða fjandans nagladekkin, allt eftir hvernig á málið er litið, þau munu nú spæna malbik og olíumöl með tilheyrandi svifryki en það er vandlifað í landi sem aldrei getur gert upp við sig hvort ríkja á sumar eða vetur. Ólíkt íbúum eylandsins, sem flestir hefðu kosið sunnanþey að sumri, er undir hælinn lagt hvenær máttarvöldum þóknast að senda hann og meðan svo er þreyjum við þorrann og sjáum til hvenær grípa skal til broddanna á ný.