Kaupvangur
við Hafnarbyggð

Kaupvangur eða Faktorshúsið er eitt af gömlu húsunum í bænum. Það var byggt sumarið 1884. Byggingameistarinn var hinn danski Fredrik Bald, sá hinn sami og reisti Alþingishúsið í Reykjavík. Danska verslunarfélagið Ørum & Wolff nýtti húsið til 1918 en þá keypti Kaupfélag Vopnfirðinga húsnæðið og rak þar verslun til ársins 1959.

Í húsinu var aðalverslun kaupfélagsins og íbúð kaupfélagsstjóra. Eftir að verslunin var flutt úr húsinu voru þar þrjár íbúðir sem og vörugeymsla fyrir kaupfélagið fram til ársins 1982 - eftir það stóð húsið autt um árabil.

Um aldamótin 2000 var húsið að hruni komið, ekkert var eftir annað en að rífa það eða kveikja í því.

Sveitarfélagið réðist þá í það stórvirki að endurgera þetta fornfræga hús og blasir það nú við gestum Vopnafjarðar sem glæsilegt vitni um stórhug hins gamla tíma og hins nýja um leið.


Framtíðin
við Hafnarbyggð

Skammt ofan eyrinnar stendur myndarlegt timburhús á hlöðnum grunni, hæð og ris, og endurreist vekur það athygli. Nafn sitt, Framtíðin, dregur húsið af verslunarfélaginu er húsið reisti árið 1900 og bar sama nafn. Félagið var þannig til fyrir tíma kaupfélagsins en verslunarfélagið Örum og Wulff var hins vegar áður búið að hreiðra um sig í Kaupvangi steinsnar frá sjávarsíðunni - og ekki langt frá þessu húsi.

Grímur Laxdal kaupmaður fór fyrir verslunarfélaginu og hjá honum starfaði sem verslunarstjóri um árabil Árni Jónsson, faðir Jóns Múla og Jónasar Árnasona. Síðastur til að reka þarna verslun var Guðni Kristjánsson á 4ða áratug síðustu aldar. Keypti Guðni m. a. sláturfé og slátraði í húsinu en síðar þjónaði það sem íbúðarhús og ullarhús enn síðar þar sem ullin var flokkuð og vigtuð áður en hún var flutt frá Vopnafirði.

Síðar tók við tímabil hnignunar og Framtíðin drafnaði niður og varð hlutskipti þess að teljast til ljótu húsanna í bænum fremur en hitt. Þegar komið var inná nýja öld tók núverandi eigandi, Árni Magnússon rafvirkjameistari, að taka þar til hendi og víst lofar verkið meistarann; Framtíðin hefur gengið í endurnýjun lífdaga og þykir með fegurstu húsum litla þorpsins við Vopnafjörðinn.


Kirkjuból
Kolbeinsgötu 7

Á Kolbeinsgötu utan við Vopnafjarðarkirkju stendur húsið Kirkjuból. Þar fæddust bræðurnir Jón Múli og Jónas Árnasynir; Jón Múli 1921 en Jónas 1923.











Vopnafjarðarkirkja
Kolbeinsgötu 9

Vopnafjarðarkirkja var byggð á árunum 1902 og 1903. Fyrir aldarafmæli kirkjunnar var ráðist í miklar endurbætur að innan og utan. Í kirkjunni er altaristafla eftir Jóhannes Kjarval auk útskorins skírnarfonts og pípuorgels.