Vopnafjörður hefur uppá ýmislegt að bjóða, íbúum sínum og gestum. Menningarmálum hefur löngum verið vel sinnt en legu sinnar vegna hafa íbúar Vopnafjarðar orðið að vera sjálfum sér nógir - og verið það. Tómstundastarf býðst í gegnum þau félagasamtök sem gefur að finna í sveitarfélaginu og fyrir útivistarmanninn er Vopnafjörður kjörinn vettvangur enda umhverfið fagurt og margar merktar gönguleiðir, bæði í næsta nágreinni þéttbýlisins og fjær.

Um árabil hefur menningarmálanefnd sveitarfélagsins verið í fylkingarbrjósti viðvíkjandi menningarstarfið, á vegum hennar eru mýmargir viðburðir, sumir árlegir meðan aðrir eru tilkomnir með skemmri fyrirvara. Allt miðar að því sama, efla menningarlega vitund meðal íbúa sveitarfélagsins en hápunktur í starfi menninarmálanefndar ár hvert hefur verið bæjarhátíðin Vopnafjarðardagar, haldin síðustu viku í júlímánuði ár hvert. Með ákvörðun nefndarinnar árið 2009, að tillögu menningarfulltrúa, er að því stefnt að bæjarhátíðin verði tengd Múlastofu og heiti Einu sinni á ágústkvöldi - og verði þá færð aftur til ágústmánaðar. Ljóst er að með þessari ákvörðun verður breytt snið á formi hátíðarinnar.

Minjasafnið Bustarfelli er minjasafn sveitarfélagsins og Kaupvangur menningarsetur þess, þar er m. a. Múlastofu og Vesturfarann að finna auk þess sem Þekkingarnet Austurlands hefur þar starfsstöð. Múlastofa er setur bræðranna frá Múla en í húsinu eru sýningar aðrar og þá sérstaklega auglýstar.

Félagsheimilið Mikligarður hefur löngum verið vettvangur viðburða af ýmsu tagi og þannig bundinn vopnfirskri menningu föstum böndum auk þess sem þar funda allar nefndir sveitarfélagsins.

Ýmis félög og samtök eru starfandi í sveitarfélaginu og setja svip á það með starfi sínu, t. a. m. hefur ungmennastarf kirkjunnar verið blómlegt.