Fréttir

12.12 2018 - Miðvikudagur

Aðventuhátíð í Vopnafjarðarkirkju

Aðventuhátíð var haldin í Vopnafjarðarkirkju síðastliðinn sunnudag, annan sunnudag í aðventu. Var allvel mætt og munar eflaust nokkru að margir koma að dagskrá aðventuhátíðar en breytir ekki að stund sem þessi er einkar hátíðleg. Það er alltaf ánægjulegt að njóta samvista við börn og unglinga, framlag þeirra var afgerandi í athöfninni. Þannig söng barnakórinn jólalög, hljómaði söngur þeirra fagurlega og nemendur úr tónlistarskólanum léku á hljóðfæri undir stjórn Stephens. Stýrði Stephen samspili þeirra af stakri snilld. Jólasaga sr. Þuríðar er varðaði undirbúning jólanna var ágætis áminning til okkar í neyslusamfélagi samtímans.

10.12 2018 - Mánudagur

Bókakynning, ánægjuleg kvöldstund

Rithöfundalestin átti viðkomu á Vopnafirði að kvöldi laugardagsins áttunda sl. svo greint var frá fyrir helgi að myndi verða. Úr lestinni stigu rithöfundarnir Stefán Bogi Sveinsson, Kristborg Bóel Steindórsdóttir, Benný Sif Ísleifsdóttir, Gerður Kristný og Einar Kárason. Það var nokkur hópur sem kaus að halda til móts við aðkomufólk og hlýða á það sem það hafði að segja og ekki bar á öðru en fólk hafi átt ánægjulega kvöldstund í minni sal Miklagarðs. 

07.12 2018 - Föstudagur

Rithöfundalest(ur) á Vopnafirði laugardaginn 08. desember

Árviss rithöfundalest fer um Austurland dagana 06. - 08. desember. Er síðasta viðkoma lestarinnar á Vopnafirði á morgun, laugardaginn áttunda í félagsheimilinu Miklagarði kl. 20:30. Um er að ræða samstarf Skriðuklausturs, Skaftfells, Ungm.fél. Egils Rauða og menningarmálanefndar Vopnafjarðar. Hefur samstarfið verið við lýði um árabil og farsælt skilað á Austurland mörgum af bestu rithöfundum þjóðarinnar. Á ferð að þessu sinni verða fimm höfundar með nýjustu verk sín: Einar Kárason með Stormfugla, Gerður Kristný með ljóðabókina Sálumessu, Benný Sif með Grímu og Jólasveinarannsóknina, Kristborg Bóel með 261 dagur, Stefán Bogi Sveinsson með ljóðabókina Ópus og Steinunn Ásmundsdóttir, með Manneskjusögu og ljóðabókina Áratök tímans.

05.12 2018 - Miðvikudagur

Fyrsti í aðventu

Síðastliðinn sunndag var fyrsti sunnudagur í aðventu sem er staðfesting þess að innan 4ra sunnudaga eru komin jól. Þess er minnst um land allt og um heim allan raunar að við höfum sett miðið á hátíð ljóss og friðar. Aðventa kemur úr latínu, Adventus - „koman“ eða „sá sem kemur“. Er aðventan í Kristni fjórir síðustu sunnudagarnir fyrir jóladag. Hefð er komin á að tendrað er á ljósum jólatrésins við Kaupvang að þessu tilefni en fyrr um daginn var messa í Vopnafjarðarkirkju og opið hús á Hótel Tanga í framhaldi af henni.

03.12 2018 - Mánudagur

Fullveldishátíð Vopnfirðinga – 100 ára fullveldi fagnað

Þann 1. desember sl. fagnaði íslensk þjóð að liðin eru 100 ár frá því að Ísland varð frjálst og fullvalda ríki með gildistöku sambandslaganna 1. desember 1918. Líklega má staðhæfa að það hafi verið merkasti áfanginn í sjálfstæðisbaráttunni sem þá hafði staðið í nær eina öld. Árið sem brátt er að baki ber einkunnarorðin Fögnum saman 100 ára fullveldi! Skipaði Alþingi afmælisnefnd sem m.a. var falið að hvetja skóla til þess að beina sjónum að þeim merku tímamótum sem urðu í íslensku samfélagi með sambandslögunum árið 1918. Vopnfirðingar minntust tímamótanna með glæsilegri dagskrá í Vopnafjarðarskóla.

30.11 2018 - Föstudagur

Messa og jólatréð við Kaupvang

Á sunnudag næstkomandi er fyrsti sunnudagur í aðventu og samkvæmt hefðinni er kveikt á ljósum jólatrésins við Kaupvang. Við höfum reynslu af alls kyns veðri en samkvæmt veðurspá Veðurstofunnar eru líkur á að veðrið verði skaplegt eða NV 4 m/sek. og lítilsháttar snjókoma. Myndarlegt tréð er gjöf HB Granda hf. til Vopnfirðinga og kemur úr landsins stærsta skógi, Hallormsstað.

29.11 2018 - Fimmtudagur

Fullveldishátíð Vopnfirðinga

Vopnafjarðarskóli í samstarfi við menningarmálanefnd býður til fullveldishátíðar í Vopnafjarðarskóla laugardaginn 1. desember. 100 ár verða þá liðin frá því að Ísland varð frjálst og fullvalda ríki. Eru allir íbúar hjartanlega velkomnir til hátíðarinnar.

29.11 2018 - Fimmtudagur

Selárlaug lokuð 1. desember

Íslensk þjóð fagnar 100 ára fullveldi þann 1. desember nk. og er öllum íbúum boðið til fullveldishátíðar í Vopnafjarðarskóla frá og með kl. 14. Af þessu tilefni er Selárlaug lokuð þennan merka dag og er þess vænst að sem flestir geri sér dagamun og taki þátt í hátíðardagskránni í Vopnafjarðarskóla.

29.11 2018 - Fimmtudagur

Selárlaug í kaldara lagi

Starfsmaður Selárlaugar vill koma þeim upplýsingum á framfæri að afloknu úrhelli gærdagsins og næturinnar ásamt nokkrum vindstyrk er laugin og potturinn í kaldara lagi í dag. Hiti sundlaugar þessa stundina er 27°C eða 5-6 °C undir meðallagi og heiti potturinn 37°C eða ca. 3°C lægra en er öllu jafna.

Breytingar til batnaðar eru síðan háðar veðri.

28.11 2018 - Miðvikudagur

Bílar og vélar meðal framúrskarandi fyrirtækja

Bílar og vélar ehf. á Vopnafirði er meðal 27 fyrirtækja á Austurlandi sem eru á lista Creditinfo yfir framúrskarandi fyrirtæki á Íslandi. Var listinn kynntur um miðjan mánuðinn en B&V hefur um árabil tilheyrt þessum hópi fyrirtækja. Hefur Creditinfo um 9 ára skeið birt lista yfir framúrskarandi fyrirtæki á Íslandi, þau voru alls 857 árið 2017 og sem fyrr greinir 27 með heimilsfestu á Austurlandi. Er gleðilegt til þess að vita að Vopnfirðingar skuli eiga fyrirtæki í þessum ágæta hópi en það eru skilyrði sem uppfylla verður og engan veginn sjálfgefið að taka sæti meðal framúrskarandi fyrirtækja.

 


13 - 22 af 2095
1 2 3 4 5 6 7 8 9 10  > 




Tungumál


Skipta um leturstærð


Leit



Flýtileiðir