Fyrstu kolmunnafarmarnir til Vopnafjarðar

10.11 2017 - Föstudagur

Frá því er greint á vefsíðu HB Granda hf., www.hbgrandi.is, í fyrradag að vinnsla á kolmunna væri hafin hjá fiskmjölsverksmiðju HB Granda á Vopnafirði. Byrjað var að bræða kolmunna í verksmiðjunni um hádegisbilið daginn áður eftir að Venus NS og Víkingur AK komu til Vopnafjarðar með um 800 tonna afla. Skipin eru þessa stundina bæði í höfn eftir að hafa verið á miðunum.

 

Skip HB Granda, Eskju og fleiri eru á kolmunna meðan önnur útgerðarfyrirtæki hafa hafið veirðar á íslensku sumargotssíldinni. Skipin hafa verið austast í íslenskri lögsögu í leit að kolmunna en dauft verið yfir veiðum. Ekki er ólíklegt að þau færi sig suður á bóginn og inn í lögsögu Færeyja á næstu dögum.

 

Í viðtali á vefsíðu HB Granda sagði Sveinbjörn verksmiðjustjóri Sigmundsson: „Skipin komu inn vegna brælu á miðunum og slæms veðurútlits og voru því með minni afla en ella,“ og vitnaði til þess að skipin komu inn í fyrradag svo sem greinir frá að ofan.

 

P2128070.JPGAð sögn Sveinbjörns er kolmunninn hið besta hráefni, feitur og fallegur fiskur, og á hann von á því miðað við kvótastöðuna að kolmunnaafli muni duga verksmiðjunni vel fram í næsta mánuð.

 

„Framhaldið veltur auðvitað mest á því að kolmunninn gefi sig til og á tíðarfarinu. Mér skilst að vertíðin hafi byrjað vel út af Seyðisfirði en síðan hafi aflinn dregist saman. Það má vel vera að fara þurfi dýpra og lengra eftir kolmunnanum en það kemur í ljós á næstu dögum og vikum,“ ssagði Sveinbjörn ennfremur.

 

Það sem af er ári hefur verksmiðjan á Vopnafirði alls unnið úr tæplega 69 þúsund tonnum af hráefni og hefur starfsemin gengið vel. Verksmiðjan nýtir alfarið umfram rafmagnsorku til framleiðslunnar og hefur framboð raforku verið það tryggt að ekki hefur þurft að grípa til þess að keyra verksmiðjuna með olíu.

Þess má að lokum geta að starfsmenn félagsins og makar munu koma saman til skemmtikvölds í félagsheimilinu Miklagarði annað kvöld, laugardaginn 11. nóvember. Það verður án alls efa ánægjuleg stund fyrir alla hlutaðeigendur enda alkunna að maður er manns gaman.




Tungumál


Skipta um leturstærð


Leit



Flýtileiðir