Lækkun kosningaaldurs í 16 ár

12.01 2018 - Föstudagur

Lagt er til að kosningaaldur til sveitarstjórna lækki úr 18 í 16 ár í frumvarpi sem er nú í umsagnarferli á Alþingi. Að frumvarpinu standa 15 þingmenn úr öllum þingflokkum. Á fundi sveitarstjórnar Vopnafjarðarhrepps var málefnið til umræðu undir almenn mál, Umsögn um frumvarp til laga um breytingar á lögum um kosningar til sveitarstjórnar, Þingskjal 40. Er skemmst frá því að segja að frumvarpið hlaut jákvæða efnismeðferð í sveitarstjórn.

 

Í bókun sveitarstjórnar stendur:

 

Sveitarstjóri kynnti málið nánar. Eftirfarandi samþykkt var gerð:

 

„Inntak frumvarpsins er að lækka kosningaaldur vegna kosninga til sveitarstjórna úr 18 árum í 16 ár. Verði frumvarpið að lögum munu hin nýju lög öðlast gildi fyrir næstu kosningar til sveitarstjórna í maí 2018. Sveitarstjórn Vopnafjarðarhrepps telur jákvætt að auka áhrif ungs fólks við mótun sveitarfélaganna, með því að lækka kosningaaldur í 16 ár.

 

Með kosningarétti fylgir jafnframt réttur til setu í sveitarstjórnum. Samhliða slíkri lagabreytingu telur sveitarstjórn mikilvægt að löggjafinn skoði hvort þessi lagabreyting, skapi ósamræmi sem geti haft áhrif á störf sveitarstjórnarmanna s.s. hvað varðar lögræði og fjárræði. Í 1. mgr. 3. gr. laga um kosningar til sveitarstjórnar, segir að einungis lögráða aðilar séu kjörgengir.“

 

Í greinargerð kemur fram að frumvarpinu sé ætlað að styðja við lýðræðisþátttöku ungs fólks og auka tækifæri þess til að hafa áhrif á samfélagið sem virkir og ábyrgir þátttakendur. Kjósendum mun fjölga um nærri 9.000 manns verði frumvarpið að lögum.

 

Jafnframt er rýmkun kosningaaldurs sögð á meðal brýnustu umræðuefna samtímans og að allvíða hafi verið stigin skref til lækkunar, enda þótt málið hafi verið nálgast með ólíkum hætti eftir löndum. Dæmi séu um að kosningaaldur hafi verið víkkaður út í sérstökum kosningum, s.s. þjóðaratkvæðagreiðslum eða í kosningum til tiltekinna stjórnsýslustiga, eins og einmitt er gert ráð fyrir í umræddu frumvarpi.

 

Þá er þess getið, að á árinu 2007 hafi Austurríki orðið fyrst landa til að lækka kosningaaldur niður í 16 ár í öllum kosningum og kjörgengisaldur í 18 ár nema í forsetakosningum. Þar var áfram stuðst við óbreytt aldursviðmið eða 35 ár.

 

Umsagnarfrestur um frumvarpið er til 19. janúar nk. Unnið er að því hjá sambandinu að fá þann frest lengdan svo að leggja megi málið fyrir næsta stjórnarfund, sem verður 26. janúar.




Tungumál


Skipta um leturstærð


Leit



Flýtileiðir