Víkingur AK á heimleið með tæplega 2600 tonn af kolmunna

21.03 2018 - Miðvikudagur

HB Grandi náði að afla allra þeirra 33.800 tonna sem félagið átti í loðnukvóta á þessu tímabili og lauk vertíðinni þann 12. mars sl. Mikil dreifing var á loðnunni og því talið vandkvæðum bundið að áætla stærð stofnsins. Um miðjan dag í dag er von á Víkingi AK til Vopnafjarðar með tæplega 2.600 tonna kolmunnaafla. Þetta er fyrsta veiðiferð skipsins á árinu á kolmunnamiðin vestur af Írlandi en þar er nú töluverður fjöldi íslenskra, færeyskra og rússneskra skipa að veiðum á alþjóðlegu hafsvæði. Frá þessu er greint á vefsíðu félagsins, www.hbgrandi.is

 

„Við fórum frá Reykjavík 11. mars sl. og byrjuðum veiðar þann 14. mars. Þetta er löng sigling og mig minnir að það hafi verið 660 sjómílur frá Reykjavík á miðin,“ sagði Albert Sveinsson skipstjóri á Víkingi en að hans sögn byrjaði veiðin mjög vel. Kvað þá hafa t.a.m. fengið 1.1000 tonn fyrsta sólarhringinn en eftir það hafi aflinn tregast verulega.

 

Albert segir að þegar aflinn minnkaði þá hafi kolmunninn virst ganga austur inn í írsku lögsöguna.

 

„Ég ákvað því að fara norðar en þar hafði verið ágæt veiði. Hún var þó að dala. Í næstu holum fengum við 150 og 180 tonn og þegar við hættum veiðum þá hífðum við 30 tonn eftir 13 tíma hol,“ sagði Albert en hann segir skipstjórnarmenn á alþjóðlega hafsvæðinu vera nokkuð sammála um að stefnan á kolmunnanum hafi meira verið austlæg frekar en að hann hafi verið á göngu norður í áttina að færeysku lögsögunni.

 

„Þegar við fórum af miðunum voru menn farnir að leita að kolmunna sunnar og vonandi ber sú leit árangur,“ sagði Albert ennfremur en hann segir kolmunnann sem fékkst í túrnum vera stóran og fínasta hráefni.




Tungumál


Skipta um leturstærð


Leit



Flýtileiðir