Af aðalfundi SSA

17.09 2018 - Mánudagur

Á vef SSA, Samband sveitarfélaga á Austurlandi, er greint frá 52. aðalfundi sambandsins sem haldinn var 07. og 08. september sl. á Hallormsstað. Kjörnir fulltrúar þeirra sjö sveitarfélaga sem mynda landshlutasamtökin samþykktu á fundinum sameiginlegar ályktanir landshlutans. Þá voru afhent Menningarverðlaun SSA 2018 og heiðursgestur úr hópi sveitarstjórnarmanna heiðraður. Í nýrri stjórn sambandsins tekur sæti Sigríður Bragadóttir oddviti Vopnafjarðarhrepps, formaður var á fyrsta fundi stjórnar kjörinn Einar Már Sigurðarson, Fjarðabyggð.

 

Fundinn sóttu fulltrúar allra sveitarfélaga á Austurlandi auk þess sem nokkrir þingmenn kjördæmisins og fleiri gestir sátu fundinn. Dagskrá fundarins markaðist af fjölda nýrra fulltrúa en talsverð endurnýjun varð í sveitarstjórnarkosningunum á vordögum. Áhersla var á kynningu á SvAust, starfsemi Austurbrúar, framkvæmd áhersluverkefna Sóknaráætlunar Austurlands tengdum menningu, áfangastaðnum Austurlandi og Svæðisskipulagi Austurlands. Auk þess kynnti Karl Björnsson framkvæmdastjóri starfsemi Sambands íslenskra sveitarfélaga og Hólmfríður Sveinsdóttir sérfræðingur hjá samgöngu- og sveitarstjórnarráðuneytinu sagði frá Sóknaráætlun.

 

Heiðursgestur í kvöldverði á aðalfundinum var Broddi Bjarnason fyrrverandi formaður SSA og bæjarfulltrúi á Fljótsdalshéraði. Menningarverðlaun SSA voru einnig afhent en þau hlaut Breiðdalssetur.

 

Að venju var samþykkt ályktana meginverkefni fundarins, en þær móta stefnu landshlutans á öllum sviðum. Í ályktunum er mikil áhersla lögð á að þjónusta við íbúa Austurlands verði ásættanleg, hvort sem er í heilbrigðisþjónustu, samgöngum eða menntamálum og að jöfnuður ríki meðal landsmanna t.d. varðandi flutningskerfi raforku og húshitunarkostnað.

 

Á fundinum var ný stjórn kjörin en hana skipa: Einar Már Sigurðarson, Fjarðabyggð, Gauti Jóhannesson, Djúpavogshreppi, Gunnar Jónsson, Fljótsdalshéraði, Hildur Þórisdóttir, Seyðisfirði, Pálína Margeirsdóttir, Fjarðabyggð, Sigíður Bragadóttir, Vopnafjarðarhreppi og Stefán Bogi Sveinsson, Fljótsdalshéraði.

 

Meðfylgjandi mynd er af vef SSA, ssa.is




Tungumál


Skipta um leturstærð


Leit



Flýtileiðir