Þrjár Rauða krossdeildir sameinast

19.11 2018 - Mánudagur

Austurfrétt greinir frá því á vefsíðu sinni í dag að 3 Rauða krossdeildir á Austurlandi muni sameinast innan tíðar. Um er að ræða Vopnafjarðardeild RKÍ, Héraðs- og Borgarfjarðardeild og ber hin nýja deild nafnið Rauði krossinn í Múlasýslu. Munu þær tvær síðarnefndu þegar vera sameinðar í eina. Sölvi Kristinn formaður deildarinnar á Vopnafirði segir sameininguna efla báðar deildir.

 

Aðspurður kvað Sölvi Kristinn hugmyndina um að leita sameiningar hafa komið á sl. ári meðal félagsmanna hér á Vopnafirði. Segir hann mannfæð standa starfinu fyrir þrifum og eins og oft vill verða hvílir starfið á fárra herðum. „Með sameingunni er komið sterkt bakland sem styrkir starfið heima fyrir, úr því verður ekki dregið. Við búum svo vel hér að vera með sterkt ungmennafélag, björgunarsveit, slysavarnarfélag, kvenfélag og fleiri félagasamtök. Fólk dreifist víða. Því er ekki að neita að starfið er búið að vera í lægð í nokkurn tíma. Innan tíðar blasir við vinna við verkáætlun og með sameiningunni erum við enn betur tengd félagsþjónustunni.“

 

Stofnfundur þessarar sameinuðu deildar var haldinn á Bókakaffinu Hlöðum í Fellabæ þann 29. október sl. en sameiningin gengur formlega í gildi þann 01. janúar næstkomandi. Guðný Björnsdóttir frá Landsskrifstofu Rauða krossins og Sveinn Kristinsson, formaður samtakanna, mættu á fundinn ásamt stjórnarmönnum deildanna og sjálfboðaliðum. „Landsskrifstofan hefur hvatt til sameinga því stærri eru deildirnar sterkari auk þess sem yfirstjórnin er þynnt.“

 

Starfssvæði deildarinnar markast af Vopnafirði, Fljótsdalshéraði og Borgarfirði eystra. Deildarstjórnin verður fimm manna og allt að fjórir í varastjórn. Þrír stjórnarmenn skulu koma frá Héraði, einn frá Vopnafirði og einn frá Borgarfirði eystra. Varamenn eru boðaðir á stjórnarfundi og hafa málfrelsi og tillögurétt. Varamenn skiptast þannig að tveir eru frá Héraði, einn frá Borgarfirði og einn frá Vopnafirði.

 

Rauði krossinn 2.pngSölvi Kristinn segir að sameingarferlið muni í heildina taka heilt ár. „Það þarf að leggja tillöguna fyrir aðalfund, bæði hér á Vopnafirði og á Egilsstöðum. Þetta er núna á lokametrunum, sameiningarfundurinn er afstaðinn en hin nýja deild hefur formlega starfsemi strax á nýju ári“.

 

Sölvi Kristinn segir helstu verkefni deildarinnar hafa verið í kringum fatagáminn, skyndihjálparnámskeið, neyðaraðstoð og svo jólaaðstoð, sem hann segir að sé sem betur fer lítil þörf á en þurfi þó að vera til staðar. „Fólk þarf alls ekki að hræðast sameiningar og ég held að þetta sé það sem koma skal enda ekkert vandamál með nútíma tækni. Deildirnar munu funda reglulega saman og núna erum við að fara að móta okkar stefnu og semja verkáætlun. Eftir áramót förum við svo af stað með einhver verkefni.“




Tungumál


Skipta um leturstærð


Leit



Flýtileiðir