Endurbætur á fiskimjölsverksmiðju HB Granda

16.01 2019 - Miðvikudagur

Endurbætur hafa staðið yfir og standa enn við fiskimjölsverksmiðju HB Granda á Vopnafirði. Þótt það sé mikið verk að vinna að skipta út eimingartækjum verksmiðjunnar hefur farið tiltölulega lítið fyrir framkvæmdunum og skýrist að einhverju leyti á að byggingarnar eru óbreyttar. Raunar varð að rjúfa þak verksmiðjunnar við framkvæmdirnar. Á heimasíðu HB Granda er frá endurbótunum greint og rætt við Sveinbjörn Sigmundsson verksmiðjustjóra af því tilefni. Þetta mikla verk hófst í vikunni fyrir jól en því á að vera lokið fyrir 20. janúar nk.

 

Í fréttinni segir Sveinbjörn um verkefnið: „Það var kominn tími á þessar endurbætur enda eru gömlu eimingartækin, sem við skiptum út, orðin 20 til 30 ára gömul. Með nýju tækjunum eiga afköstin að verða stöðugri og aukast frá því sem nú er. Það bætir rekstraröryggið. Of snemmt er að segja til um um áhrifin á orkunotkunina en við erum að vona að nýju tækin eyði minni raforku.“

 

Nýju eimingartækin voru smíðuð hjá Héðni hf. og sjá starfsmenn þess fyrirtækis um uppsetninguna með hjálp starsfsmanna verksmiðjunnar og verktaka á Vopnafirði. Eimingartækin eru engin smásmíði og þyngsti eimarinn vó t.a.m. um 20 tonn.

 

„Við fengum trésmíðafyrirtæki á staðnum til að rjúfa þak verksmiðjunnar og svo voru gömlu tækin hífð út og þau nýju inn. Okkur telst til að þetta hafi alls verið 160 til 170 tonn. Það gefur að skilja að það er erfitt verk að koma öllu fyrir og við höfum þurft að vinna allt upp í 18 metra hæð frá gólfi. En verkinu miðar mjög vel og við bætum bara í ef aflafréttir nú eftir áramótin gefa tilefni til þess,“ sagði Sveinbjörn Sigmundsson í viðtalinu. 




Tungumál


Skipta um leturstærð


Leit



Flýtileiðir