Fréttir

04.02 2019 - Mánudagur

Tvískiptur janúar, hlýr og kaldur

Að baki er fyrsti mánuður ársins, janúar hefur kvatt og kemur ekki aftur í sömu mynd. Það er gjarnan á orði haft að janúar líði æði hægt, sé 45 dagar og ekki 31. Hver sem skoðun fólks kann að vera er janúar að baki og febrúar tekinn við. Veðurfarslega var janúar sérlega tvískiptur. Óvenju mikil hlýindi einkenndu fyrri hluta mánaðarins, hiti var langt yfir meðallagi um land allt og snjólétt víðast hvar. Seinni hluti mánaðarins var mun kaldari og þá sérstaklega síðustu dagarnir. Töluverður snjór var víða um land, vindur hægur og nokkuð bjart í veðri.

30.01 2019 - Miðvikudagur

Vesturfarinn og ferðamálasamtökin fengu styrk úr Uppbyggingarsjóði

Á haustdögum auglýsti Austurbrú eftir umsóknum í Uppbyggingarsjóð Austurlands fyrir árið 2019 en hlutverk sjóðsins er að styrkja menningar-, atvinnu- og nýsköpunarverkefni sem falla að Sóknaráætlun Austurlands. Auk heldur veitir sjóðurinn stofn- og rekstrarstyrki til menningarmála. Í fyrradag var komið að fimmtu úthlutun úr Uppbyggingarsjóði, liðlega 60 milljónum var veitt til 61 verkefnis og voru Vesturfarinn og Ferðamálasamtök Vopnafjarðar meðal styrkþega.

28.01 2019 - Mánudagur

Veiðistofn loðnu lítill

Hafrannsóknarstofnun hefur haldið úti loðnuleit líkt og stofnuninni er ætlað að gera sl. mánuði. Í haust var farinn leiðangur og annar 04.-15. janúar sl. Hingað til hefur árangurinn ekki gefið tilefni til bjartsýni því veiðistofn loðnunnar er svo lítill, samkvæmt áðurgreindum mælingum, að hann nær ekki þeirri lágmarksstærð sem þarf til þess að mælt sé með loðnuveiðum á yfirstandandi vertíð. Þorsteinn Sigurðsson, sviðsstjóri uppsjávarlífríkis hjá Hafrannsóknastofnun, segir í viðtali við RUV að þó sé ekki öll nótt úti enn. Ráðist verður í frekari mælingar á stærð veiðistofnsins á næstunni í von um að loðnan skili sér á miðin í kringum landið.

25.01 2019 - Föstudagur

Þorri genginn í garð - bondadagur í dag

Í dag er fyrsti dagur þorra, bóndadagur, dagur allra karlmanna og fá þeir hamingjuóskir sendar á þessum vettvangi. Er á sinn hátt stórmerkur því ekki hafa karlmenn annan dag sérmerktan. Samkvæmt gamla norræna tímatalinu er þorrinn, sem er fjórði mánuður vetrar og hefst sem fyrr greinir á bóndadegi á föstudegi í 13. viku vetrar, sem getur verið á bilinu 19. – 26. janúar - stendur uppá 25ta að þessu sinni. Þorranum lýkur á þorraþræl sem er laugardagurinn fyrir konudag og tekur þá góa við.

24.01 2019 - Fimmtudagur

Vopnfirðingar á þingi

Gunnar Gunnarsson ritstjóri Austurgluggans/-fréttar er með bráðskemmtilega og jafn athyglisverða frétt á vefsíðu blaðsins, www.auturfrett.is, í dag en þar gerir Gunnar að umfjöllun styrk Vopnfirðinga á Alþingi Íslendinga þessa vikuna. Og ekki að ástæðulausu því Vopnfirðingar eru með tvo þingmenn og tvo aðra í starfsliði þingflokka. Þeir dreifast á þrjá flokka. Í gær flutti Bjartur Aðalbjörnsson jómfrúarræðu sína á þinginu, sbr. hér að neðan 

https://www.facebook.com/Samfylkingin/videos/vb.152804904889/2141845202538197/?type=2&theater 

23.01 2019 - Miðvikudagur

Selárlaug opnar kl. 16:30 í dag

Athygli sundlaugargesta er vakin á að Selárlaug opnar síðar í dag en öllu jafna vegna útfarar og verður laugin opin milli kl. 16:30 og 19:00. Á morgun er opið samkvæmt vetraropnun milli kl. 14:00-19:00.

-Fulltrúi 

21.01 2019 - Mánudagur

Nýtt kynningarmyndband um Austurland

Þann 17. janúar sl. fór í dreifingu nýtt og glæsilegt kynningarmyndband um Austurland. Myndbandið, sem er eins konar örsaga, lýsir upplifun aðkomumanneskju af svæðinu í máli og mögnuðum myndum og tekst þannig að gefa áhorfendum innsýn inn í þennan sérstaka og töfrandi landshluta. Myndbandið er framleitt og tekið upp af Sebastian Ziegler en leikstjóri var Henrik Dyb Zwart og með aðalhlutverk fór Nanna Juelsbo.

18.01 2019 - Föstudagur

Tilraunaverkefni Íbúðalánasjóðs

Vopnafjarðarhreppur var eitt hinna 33ja sveitarfélaga sem sóttu um þátttöku í tilraunverkefni ríkisins í húsnæðismálum en að baki verkefninu standa velferðarráðuneytið og Íbúðalánasjóður. Sjö sveitarfélög voru valin úr hópnum og fór svo að Seyðisfjarðarkaupstaður var hið eina af Austurlandi. Í 1. gr. reglugerðar um húsnæðisáætlanir segir að sveitarfélög skulu gera húsnæðisáætlun til fjögurra ára í senn. Skal hún byggja á greiningum um þörf fyrir íbúðarhúsnæði í sveitarfélaginu með tilliti til mismunandi búsetuforma.

16.01 2019 - Miðvikudagur

Endurbætur á fiskimjölsverksmiðju HB Granda

Endurbætur hafa staðið yfir og standa enn við fiskimjölsverksmiðju HB Granda á Vopnafirði. Þótt það sé mikið verk að vinna að skipta út eimingartækjum verksmiðjunnar hefur farið tiltölulega lítið fyrir framkvæmdunum og skýrist að einhverju leyti á að byggingarnar eru óbreyttar. Raunar varð að rjúfa þak verksmiðjunnar við framkvæmdirnar. Á heimasíðu HB Granda er frá endurbótunum greint og rætt við Sveinbjörn Sigmundsson verksmiðjustjóra af því tilefni. Þetta mikla verk hófst í vikunni fyrir jól en því á að vera lokið fyrir 20. janúar nk.

14.01 2019 - Mánudagur

Örlar á vetri

Um miðjan dag sl. laugardag varð regn að slyddu, síðar að snjókomu og snjóaði fram á kvöld í allhvassri norðanátt. Auðar götur fengu hvíta ábreiðu, hana misþykka og ásýnd lands tók að minna á að árstíðin er vetur. Um nótt hafði birt til og er svo enn þegar þetta er ritað að morgni mánudagsins 14. janúar, bjart og fagurt veður í 8°C frosti. Að venju voru starfsmenn þjónustumiðstöðvar sveitarfélagsins komnir af stað snemmdægurs að morgni sunnudagsins og hófu hreinsum gatna og hið sama gerðu starfsmenn Steineyjar og fóru um þjóðvegi þá sem þeir hafa með höndum.


113 - 122 af 2222
< 11 12 13 14 15 16 17 18 19 20  > 




Tungumál


Skipta um leturstærð


Leit



Flýtileiðir