Fréttir

23.02 2018 - Föstudagur

Selárlaug lokuð laugardaginn 24. febrúar

Vakin er athygli á að Selárlaug er lokuð á morgun, laugardaginn 24. febrúar, af óviðráðanlegum orsökum. Laugin er opin samkvæmt vetraropnun á sunnudag milli kl. 12:00 - 16:00.

Vakin er ennfremur athygli á að frá og með fimmtudag 01. mars nk. lengist opnun Selárlaugar um eina klukkustund og verður opið virka daga, þriðjudag til og með föstudag, milli kl. 14:00 - 19:00. Helgaropnun verður áfram hin sama.

-Fulltrúi

21.02 2018 - Miðvikudagur

Lífshlaupinu lokið í ár

Lífshlaupinu, heilsu- og hvatningarverkefni Íþrótta- og Ólympíusambands Íslands, lauk í gær.  Á Vopnafirði voru nokkrir vinnustaðir og grunnskólinn meðal þátttakenda en hlaupinu er ætlað að höfða til allra aldurshópa. Það er ánægjulegt að greina frá því að Vopnafjarðarskóli hafnaði í 2. sæti grunnskóla með 3-89 nemendur en skólinn hefur ávallt staðið sig vel. Hið sama má segja um leikskólann, hafnaði Brekkubær í 3ja sæti í sínum flokki, vinnustaðir með 5-9 starfsmenn og skrifstofa Vopnafjarðarhrepps í sama flokki í því 7. Blikar ehf. voru ennfremur í þessum flokki og lentu í 14. sæti en alls skráðu sig 140 vinnustaðir í þessum flokki þótt þátttakan hafi ekki verið slík.

 

19.02 2018 - Mánudagur

Konudagur í brennidepli

Í gær var konudagur samkvæmt gamla tímatalinu og fyrsti dagur í Góu sem markar næstseinasti mánuð vetrarmisseris. Á Vopnafirði var eitt og annað gert í tilefni dagsins svo sem sagt var frá hér fyrir helgi að myndi verða. Þannig bauð Einherji upp á sölu blóma í grunnskólanum að morgni konudags, kaffihúsamessa haldin í Kaupvangskaffi um miðjan dag og kl. 17 sýning á endurgerðri heimildarmyndinni 690 Vopnafjörður.

16.02 2018 - Föstudagur

Blómasala, messa og bíó á konudag

Næstkomandi sunnudag er konudagur og markar upphaf Góu og stendur ávallt upp á sunnudag í 18. viku vetrar. Konudagur markar sum sé upphaf Góu rétt eins og fyrsti dagurinn í Þorra er bóndadagurinn. Á konudag minntust bændur og eiginmenn húsfreyjunnar með því að fagna góu sem færir með sér vaxandi birtu og vorinnganginn. Eitt og annað er í boði þennan dag á Vopnafirði. Þannig býður Einherji upp á blómasölu í Vopnafjarðarskóla milli klukkan tíu og tólf, klukkan 15:00 er kaffihúsamessa í Kaupvangskaffi og kl. 17:00 verður heimildarmyndin 690 Vopnafjörður sýnd í Miklagarði.

15.02 2018 - Fimmtudagur

Myndmál öskudagsins

Öskudagurinn leið áfram með velþóknun barna á öllum aldri en eins og ávallt hefur verið var þáttur Vopnafjarðarskóla stærstur. Byrjar dagurinn á samveru í íþróttahúsinu hvar kötturinn er sleginn úr tunnunni, tunnunum raunar þar eð þær eru tvær. Gekk það óvenju hratt fyrir sig að þessu sinni en svona er þetta stundum, í öðrum tilfellum er á tunnunum hamast ungviðið með litlum árangri lengi vel. Að samveru lokinni var haldið yfir í skóla áður en lagt var í hann, rölt um bæinn og góðgæti þegið í kjölfar söngs. Síðar um daginn var svo öskudagsskrall í félagsmiðstöðunni.

14.02 2018 - Miðvikudagur

Öskudagurinn – dagur allra barna

Dagurinn í dag er dagur allra barna á öllum aldri, öskudagurinn sjálfur og er óskandi að öll börn njóti hans til fullnustu. Sá sem þetta ritar á dásemdar minningar frá æskuárunum á Akureyri en bærinn sá hefur löngum verið höfuðvígi öskudagshátíðarhalda. Önnur bæjarfélög hafa löngu tekið upp háttu norðanmanna en ekki kom til greina að skóli væri starfræktur þennan dag nyrðra heldur var mætt í bítið til þess að gera sig kláran fyrir daginn - og snemma var rölt af stað og voru engir foreldrar til þess að aka með börnin á milli staða á þeim árum!

 

12.02 2018 - Mánudagur

Himinn og jörð

Mikið hefur gengið á í veðrahvolfinu yfir Íslandi sl. daga, vikur raunar. Hafa fréttir stóru fjölmiðlanna mótast af tíðarfarinu syðra en það sem af er nýári hefur hver lægðin af annarri herjað á landið með tilheyrandi veðurhæð takmörkuðu skyggni og ófærð. Svo virðist sem fæstir sýni fyrirhyggju þegar veður versnar með því í fyrsta lagi að kynna sér veðurspána og í annan stað að leggja fyrr til vinnu/skóla eða notast við almenningssamgöngur. Afleiðingar fyrirhyggjuleysisins er kerfinu ofviða og ferð sem öllu jafna tekur 15-20 mínútur tekur allt að 2 klukkustundir – komist fólk yfir höfuð á leiðarenda. Við búum sannarlega betur í litlu samfélagi og fögnum því sjálfsagt flest þegar fréttir berast af vandræðum í umferðinni syðra að búa einmitt á litlum stað og þykjumst jafnvel sannfærð um að flestir ráði ekkert við að keyra í (smá) snjó!

 

09.02 2018 - Föstudagur

Almenn ánægja með Mannamót

Kynningarvettvangur markaðsstofa ferðaþjónustu landsbyggðanna, Mannamót, var sett upp þann 18. janúar sl. í flugskýli Ernis á Reykjavíkurflugvelli. Samstarfsfyrirtæki markaðsstofanna eru í forgrunni vinnustofunnar og voru yfir 200 sýnendur að þessu sinni, þar af 26 frá Austurlandi og hafa aldrei verið fleiri. Á vef Austurbrúar, www.austurbru.is, er um Mannamót fjallað og segir María Hjálmarsdóttir hjá Austurbrú hafa mikinn samhug ríkt meðal Austfirðinga, samheldni þeirra hafi vakið athygli. Tilgangurinn helgar meðalið, þ.e. að kynna landsbyggðarfyrirtæki fyrir ferðaþjónustuaðilum sem staðsettir eru á höfuðborgarsvæðinu. Mun það hafa vakið eftirtekt sú mikla gróska sem er að finna utan þéttbýlis suðvesturhornsins.

 

08.02 2018 - Fimmtudagur

Hjúkrunarheimilið Sundabúð - sumarafleysingar

Atvinna -  sumarafleysingar

 

Sjúkraliðar og ófaglært starfsfólk óskast til sumarafleysinga  á hjúkrunardeild Sundabúðar. Um er að ræða störf í vaktavinnu við hjúkrun aldraðra, næturvaktir í þvottahúsi og afleysingar í eldhúsi.

 

Einnig vantar starfskraft í ræstingu, vinnutími frá kl. 8 til 12.30

07.02 2018 - Miðvikudagur

Loðnukvótinn 285 þúsund tonn

Hafrannsóknarstofnun leggur til að heildarkvótinn á loðnuveríðinni verði 285 þúsund tonn. Það þýðir að 77 þúsund tonn bætast við upphafskvóta þann sem gefinn var út í haust. Í framhaldi þeirra mælinga sem gerðar voru á stærð loðnustofnsins í september og október, var úthlutað 208 þúsund tonna kvóta. Þá kom fram að ráðgjöfin yrði endurskoðuð í ljósi niðurstaðna úr mælingum síðar um veturinn 2018. Þeim mælingum lauk í liðinni viku. Í viðtali á vef HB Granda hf., www.hbgrandi.is, segir Garðar Svavarsson framkvæmdastjóri uppsjávarsviðs félagsins að niðurstaða mælinga Hafró sé mikil vonbrigði fyrir útgerðina og þeir sannfærðir um að heimila hefði mátt meiri veiði. Er kvótinn nú 14 þúsund tonnum minni en á sl. ári.


313 - 322 af 2253
< 31 32 33 34 35 36 37 38 39 40  > 




Tungumál


Skipta um leturstærð


Leit



Flýtileiðir