Fréttir

26.10 2018 - Föstudagur

Haustgleði yngri flokka Einherja

Ungmennafélagið Einherji hélt haustgleði yngri flokka félagsins á Hótel Tanga í gær og voru saman komin um 50 ungmenni að þessu tilefni. Að vanda var stemningin góð meðal hinna ungu liðsmanna sem að hafandi viðurkenningu um háls og myndatöku þáðu krakkarnir pítsu og franskar. Í upphafi viðburðar gerði formaður að umtalsefni mikilvægi félagsins í vopnfirsku samfélagi en leiða má að líkum að bróðurpartur nemenda Vopnafjarðarskóla komi að starfi félagsins, misvirk eins og gengur. Einherji er á landsvísu lítið félag en stórt í nærsamfélagi okkar en sem dæmi má áætla að leiki á vegum félagsins á sumrinu mæti eigi færri en 3000 manns eða hátt í 5 faldur fjöldi íbúa sveitarfélagsins.

24.10 2018 - Miðvikudagur

Kvennaverkfall kl. 14:55 á kvennafrídegi

Í dag, 24. október, er kvennafrídagurinn. Eru konur hvattar til að ganga út af vinnustað sínum klukkan 14:55. Í ár verður gengið út undir kjörorðunum: „Breytum ekki konum, breytum samfélaginu!“. Samkvæmt nýjustu tölum Hagstofu Íslands um launamun kynjanna voru meðalatvinnutekjur kvenna 74% af meðalatvinnutekjum karla. Konur eru því með 26% lægri atvinnutekjur að meðaltali. Samkvæmt því hafa konur unnið fyrir launum sínum eftir 5 klukkustundir og 55 mínútur miðað við fullan vinnudag frá kl. 9–17. Daglegum vinnuskyldum kvenna er því lokið kl. 14:55. Í ljósi þess lokar íþróttahúsið kl. 14:55 og opnar aftur kl. 16:00.

22.10 2018 - Mánudagur

Vinamessa

Viku vina lauk í gær með messu  og vöfflukaffi að henni lokinni. Að baki er þá níunda Vinavikan og þau sátt sem að málum koma, vikan hefur öðlast fastan sess í félags- og menningarlífi Vopnfirðinga. Því er ekki að leyna að dregið hefur úr þátttökunni. Þannig var færra í messu gærdagsins en sl. ár, færra í fyrra en árið á undan. Þeir sem ekki hafa reynt ættu að hafa í huga messu næsta árs en Vinavikumessur hafa yfir sér létt yfirbragð og er ágætis tilbreyting frá hefðbundinni messugjörð.


17.10 2018 - Miðvikudagur

Vinaganga

Annar dagur í Vinaviku er í dag en í gær fjölmenntu Vopnfirðingar í Vinagöngu, flestir voru ungir að árum en þeir voru nokkrir eldri sem slógust í för og tóku þátt í hjartagjörð við göngulok. Kaffi var í boði í framhaldi af útiveru. Fyrir 4 árum lét sr. Stefán Már þess getið að Vinagangan væri stærsta skipulagða gangan á Íslandi í október það árið og eigum við ekki bara að trúa því að það eigi við nú. Sem fyrr varðar mestu að verið er að minna á vináttuna og gildi þess að standa saman.

16.10 2018 - Þriðjudagur

Vinavika Vopnfirðinga

Vinavikan hefst í dag kl. 15 með formlegum hætti er gengin verður Vinaganga frá Vopnafjarðarskóla að Vopnafjarðarkirkju. Gengið er í nafni kærleika og vináttu. Meðal þátttakenda að þessu sinni er frú Sólveig Lára Guðmundsdóttir vígslubiskup á Hólum og kemur til með að njóta kökuhlaðborðs í safnaðarheimilinu eins og aðrir þátttakendur að göngu lokinni. Eru allir hvattir til þátttöku í gönguna en Vinavikan í ár er hin 9unda í röðinni.

15.10 2018 - Mánudagur

Kuldaboli 2018

Um helgina fór fram ungmennahátíðin Kuldaboli, samstarfsverkefni félagsmiðstöðva í Fjarðabyggð. Eins og vanalega var unglingum úr 8. – 10. bekk af öllu Austurlandi boðin þátttaka og héðan frá Vopnafirði fóru 19 ungmenni í fylgd Þórhildar Sigurðardóttur forstöðumanns félagsmiðstöðvarinnar Drekans. Aðalmarkmiðið með Kuldabola er að krakkar kynnist innbyrðis, prófi nýjar tómstundir og skemmti sér saman á heilbrigðan máta. Miðpunktur hátíðarinnar er Fjarðabyggðahöllin og þeir sem reynt hafa vita að nafngiftin Kuldaboli stendur fullkomlega undir merkjum.

 

15.10 2018 - Mánudagur

Íbúð til leigu

Til leigu er er 5 herbergja íbúð að Kolbeinsgötu 55, í blokkinni. Umsóknir berist til skrifstofu Vopnafjarðarhrepps fyrir 22. október nk. Umsóknareyðublöð má nálgast á heimasíðu Vopnafjarðarhrepps eða á skrifstofu sveitarfélagsins að Hamrahlíð 15.

12.10 2018 - Föstudagur

Síldveiðar ganga vel

Á fundi strandríkja í desember sl. náðist samkomulag um veiðar norsk-íslenskrar síldar á árinu 2018. Ekki náðist samkomulag um skiptingu heildarafla milli ríkja en aðilar komu sér saman um að miða sínar aflaheimildir við 435 þúsund tonna heildaraflamark. Vertíðin fór vel af stað og þessa dagana veiðist stór og falleg síld, mikið er til og hún yfir 400 grömm.

10.10 2018 - Miðvikudagur

Fjármálaráðstefna sveitarfélaga 2018

Fjármálaráðstefna sveitarfélaga fer fram dagana 11. og 12. október nk. Til ráðstefnunar mæta fulltrúar hinna 74ra sveitarfélaga í landinu en ráðstefnan er stærsti einstaki vettvangur sambandsins sem árlega er haldinn. Þátttakendur hafa verið yfir 400 á sl. árum en til samkomunnar eru allir velkomnir, ekki einungis kjörnir fulltrúar og starfsmenn sveitarfélaga heldur allir áhugamenn um sveitarstjórnarmál. Fleiri komast þó ekki að nú en þeir sem þegar hafa tilkynnt þátttöku sína því uppselt er á viðburðinn.

08.10 2018 - Mánudagur

Samtal við nemendur og foreldra þeirra

Á morgun er fyrirlestur í Vopnafjarðarskóla undir heitinu Fokk me - Fokk you sem fjallar um  sjálfsmynd, samfélagsmiðla og samskipti kynjanna. Er fyrirlesturinn ætlaður unglingum og ungmennum, foreldrum þeirra og aðstandendum og starfsfólki sem starfar með unglingum. Fyrirlesarar eru Andrea Marel og Kári Sigurðsson en hvor um sig hefur starfað um árabil í félagsmiðstöðvum og flutt fyrirlestra meðfram vinnu sinni. Samfés, samtök félagsmiðstöðva og ungmennahúsa á Íslandi, völdu fræðsluna Fokk Me-Fokk You besta verkefnið í opnum flokki á vettvangi frítímans á aðalfundi Samfés 2017.

 


73 - 82 af 2130
1 2 3 4 5 6 7 8 9 10  > 




Tungumál


Skipta um leturstærð


Leit



Flýtileiðir