22.02 2012 - Miðvikudagur
Dagurinn í dag er dagur allra barna á öllum aldri, öskudagurinn, og er óskandi að öll börn njóti hans til fullnustu. Sá sem þetta ritar á dásemdar minningar frá æskuárunum á Akureyri en bærinn sá hefur löngum verið höfuðvígi öskudagshátíðarhalda - og er svo enn. Önnur bæjarfélög hafa tekið upp háttu norðanmanna að einhverju leyti en ekki kom til greina að skóli væri starfræktur þennan dag heldur var mætt í bítið til þess að gera sig kláran fyrir daginn - og snemma var rölt af stað en ólíkt núinu voru engir foreldrar til þess að aka með börnin á milli staða á þeim árum!
21.02 2012 - Þriðjudagur
Á morgun, miðvikudaginn 22. febrúar, kl. 20:00 munu tveir félagar úr Hinu mikla heimsskautafélagi halda kynningu á félaginu, ferðum þess og útgáfu bókarinnar, Þar sem himininn frýs við jörð. Vettvangur viðburðar er félagsheimilið Mikligarður. Á hringsóli um landið eru þeir Ómar Friðþjófsson og Karl Rútsson, spjalla þeir við gesti auk þess sem boðið er upp á kynningu í myndum. Hefur ferð þeirra vakið athygli enda var farið um lendur sem hinn almenni borgari sækir yfirleitt ekki heim nema þá í gegnum kynningu sem þessa, bókmenntir eða DVD en hvort tveggja verður til sölu á kynningunni.
21.02 2012 - Þriðjudagur
Greint var frá því í fréttum í morgun að tveir starfsmenn HB Granda á Vopnafirði hafi verið fluttir til Akureyrar þar eð ammoníaksleka varð vart í fiskiðjuveri félagsins í gærkvöldi. Heimildarmaður setti sig í samband við Magnús Þór Róbertsson, vinnslustjóra, hér að lútandi, er staðfesti að leki hafi verið í slöngu í einum frysti uppsjávarfrystihússins en allt fór þó vel og það skiptir jú öllu máli.
20.02 2012 - Mánudagur
Föstudaginn 17. febrúar sl. komu nemendur grunnskólans saman í íþróttahúsinu til þess að sýna okkur hinum hvað þau lærðu í fótamennt í vikunni hjá Hinrik danskennara. Og víst höfðu nemendur ýmislegt numið af meistaranum og var að venju ánægjulegt að sjá til þeirra. Verður ekki hjá því komist að hugsa til þess hvers krakkarnir okkar fara á mis við að hafa öllu jafna ekki aðgengi að danskennslu en ef vel ætti að vera skyldi danskennsla vera í boði innan skólans allan veturinn, rétt eins og íþróttir aðrar.